ҚОҚАТО командасы AI & Digital Bridge 2026 халықаралық форумына қатысты

2026 жылғы 2–3 қазанда Астанада жасанды интеллект пен цифрлық технологияларға арналған AI & Digital Bridge 2026 халықаралық форумы өтті. Форум өңірдегі ең ірі алаңдардың біріне айналып, мемлекеттік органдардың басшыларын, халықаралық сарапшыларды, әлемдік технологиялық компаниялардың өкілдерін, инвесторлар мен стартаптарды бір жерге жинады. Форумға Қоршаған ортаны қорғау жөніндегі ақпараттық-талдау орталығының командасы да қатысты.

Форум бағдарламасына панельдік сессиялар, воркшоптар, стартаптардың питчингі және Astana Hub Battle финалы енді. Қатысушылар ЖИ инфрақұрылымы мен дата-орталықтарды дамытуды, жаңа буындағы электрондық үкімет Egov 3.0-ді, цифрлық саланы құқықтық реттеуді талқылады. Сондай-ақ ЖИ-ді өнеркәсіпте, қаржыда, денсаулық сақтауда, білім беруде және медиада қолдану, киберқауіпсіздік мәселелері қаралды.

Басты тақырыптардың бірі Қазақстанның Еуразиядағы жасанды интеллект хабы ретіндегі әлеуеті болды. Сарапшылар инфрақұрылым, халықаралық серіктестік, таланттар мен инвестициялар елді сала көшбасшыларының қатарына қалай шығара алатынын талқылады.

ЖИ-ді жауапкершілікпен пайдалану мәселесіне ерекше көңіл бөлінді. Өнеркәсіп пен қаржы бойынша сессиялардың спикерлері бір пікірге келді: жасанды интеллект заңдылықтарды тауып, тәуекелдерді анықтап, деректерді дайындай алады, бірақ соңғы шешім адамда қалуы тиіс. Бұл тәсіл «Human-in-the-loop» деп аталады.

Өнеркәсіптік трансформацияға арналған сессияларда ЖИ-ді табысты енгізудің негізі сапалы әрі дұрыс құрылымдалған деректер екені атап өтілді. Сарапшылар нақты өндірісте ЖИ-ді қолдану цифрлық процестерге қарағанда әлдеқайда күрделі екенін айтты. Бұл Қазақстанға осы бағытта көшбасшы болуға мүмкіндік береді.

Қаржы және киберқауіпсіздік саласында жаңа қауіптер талқыланды: дипфейктер, әлеуметтік инженерия және ЖИ көмегімен кибершабуылдардың арзандауы. Сарапшылар технологияға деген сенімді қалыптастыру инфрақұрылымның өзін құрудан қиынырақ екенін, ал пайдаланушыларды қорғау ЖИ модельдерін үздіксіз дамытуды талап ететінін атап өтті.

Пленарлық сессияда форум қатысушыларын Қазақстан Республикасының Премьер-Министрі Олжас Бектенов құттықтады. Ол форумға қатысушылардың жаңа экономикалық болмыстың куәгерлері ғана емес, оны құруға тікелей атсалысып жүргендер екенін атап өтті. Freedom Holding Corp. басшысы Тимур Турлов мемлекет цифрлық трансформацияның басты сәулетшісі екенін, ал бизнестің міндеті оны мазмұнмен толтырып, мемлекеттің сенімді серіктесі болу екенін айтты.

Әлемдік нарыққа шыққан қазақстандық технологиялық компаниялардың негізін қалаушылардың сөздері форумға ерекше леп берді. Олардың қатарында Қазақстаннан шыққан алғашқы ЖИ-единорог Higgsfield AI бар. Олардың тәжірибесі Қазақстан әлемдік технологияларды енгізіп қана қоймай, жаһандық деңгейдегі өнімдер жасай алатынын айқын көрсетті.

AI & Digital Bridge 2026 Астананың Орталық Азиядағы технологиялық көшбасшылар, инвесторлар мен таланттар үшін негізгі тартылыс орталықтарының бірі екенін тағы да дәлелдеді.