12 тамыз — Каспий теңізі күні Ақтау қаласында «Caspian Sea Action Week – 2026»

12 тамыз — Каспий теңізі күні Ақтау қаласында «Caspian Sea Action Week – 2026» халықаралық волонтерлік апталығының салтанатты жабылу рәсімі өтті. Апталық аясындағы іс-шараларға Қазақстан Республикасы Экология және табиғи ресурстар министрлігінің «Қоршаған ортаны қорғаудың ақпараттық-талдау орталығы» ШЖҚ РМК (ҚОҚАТО) қатысты.
6–12 тамыз аралығында өткен халықаралық волонтерлік апталық Қазақстан, Әзербайжан, Ресей, Иран, Түрікменстан, Өзбекстан, Қырғызстан және Тәжікстаннан келген делегацияларды, сондай-ақ мемлекеттік органдардың, халықаралық ұйымдардың, сарапшылық қауымдастықтың өкілдерін, экологтарды, волонтерлер мен жастарды бір алаңға біріктірді.
«Caspian Sea Action Week – 2026» апталығының негізгі мақсаты — Каспий теңізінің бірегей экожүйесін сақтау, экологиялық волонтерлікті дамыту, экологиялық жауапкершілікті арттыру және халықаралық ынтымақтастықты нығайту бағытында Каспий өңірі елдері мен халықаралық қоғамдастықтың күш-жігерін біріктіру.
Апталық бағдарламасы аясында ҚОҚАТО өкілдері Каспий теңізінің өзекті экологиялық мәселелеріне, бірлескен ғылыми зерттеулерді дамытуға, заманауи технологиялық шешімдерді енгізуге, экологиялық ағартуға және халықаралық өзара іс-қимылды кеңейтуге арналған негізгі іс-шараларға қатысты.
Апта бойы сараптамалық және пікірталас алаңдары, фасилитациялық сессиялар, халықаралық Caspian Hackathon, сарапшылар мен эковолонтерлердің кездесулері және Каспийді сақтауға бағытталған практикалық бастамаларды әзірлеуге арналған басқа да іс-шаралар ұйымдастырылды.
Халықаралық апталық сегіз мемлекеттің ұлттық мұрасы мен музыкалық дәстүрлерін тоғыстырған салтанатты мәдени бағдарламамен қорытындыланды. Жабылу рәсімі аясында алғаш рет «VOLUNTEERS OF THE WORLD» халықаралық волонтерлер гимні таныстырылды.
«Caspian Sea Action Week – 2026» ашық диалог, тәжірибе алмасу және жаңа бірлескен бастамаларды қалыптастыру үшін маңызды халықаралық алаңға айналды. Маңғыстау түрлі мемлекеттердің өкілдерін ортақ мақсат — Каспий теңізін болашақ ұрпақ үшін сақтау жолында біріктірді.
Бір Каспий — ортақ жауапкершілік, ортақ ынтымақтастық кеңістігі және ортақ болашақ