Дереккөз: EXPO-2017 Астана

Талаптармен Қоғамның ресми сайтында (https://expo2017astana.com/business-partnership/konkursyi) «Бизнес-серіктестік» бөлімінде танысуға болады.

Лицензиялық бағдарлама мақсаты EXPO 2017 логотипімен жоғары сапалы және арзан бағалы түрлі тауарлық санаттағы лицензиялық өнімдер өндіру болып табылады.

Көрме Лицензиаттарының артықшылығы:

• Ауқымды сату желісі – Лицензиялық өнім Көрме аумағында, Қазақстан бойынша барлық сату нүктелерінде, интернет-дүкенде сатылатын болады;
• Осындай текті ең танымал іс-шаралардың бастігіне кіретін ірі халықаралық жобаға қатысу;
• EXPO- 2017 Astana нышанымен өнімді сату есебінен тікелей табыс алу;
• EXPO-2017 Astana көрмесі кезінде сатудың айрықша құқығы;
• Халықаралық және қазақстандық деңгейде ақпараттық және жарнамалық қолдау;
• Бизнес-қоғамдастық пен сатып алушылар тарапынан өз сегментінде назар аударту.

Көрме қазақстандық бизнес өкілдері үшін көптеген перспективалар ұсынады. Көрме лицензиаты болу мүмкіндігі – осылардың бірі болып табылады.

Дереккөз: EXPO-2017 Астана

Бүгінгі таңда Астана қаласында ұйымдастырушы кеңсесінде екі ел «ЭКСПО-2017» халықаралық мамандандырылған көрмеге қатысу туралы шартқа қол қойды.

Италияның қатысуы туралы шартқа «Астана ЭКСПО-2017» Ұлттық компанияның басқарма төрағасы Ахметжан Есімов пен «ЭКСПО-2017» Италия секциясының комиссары, Италия Республикасының ҚР Төтенше және Өкілетті Елшісі Стефано Раваньян қол қойды.

Кездесу кезінде Ұлттық компания басшысы «ЭКСПО-2017» көрмесіне дайындық барысы, Италияның қатысу шарттары, сондай-ақ эаңартылатын энергия көздерін дамыту саласында біздің елдер арасында екіжақты өзара әрекет ахуалы мен перспективалары туралы айтып кетті.

«Көрме өткізуде Италия тәжірибесі біз үшін өте пайдалы болып табылады, себебі Миланда өткен ЭКСПО-2015 ең жемістілердің бірі болып танылды. Италияның жаңартылатын энергия көздері саласында жетістіктерін ескеріп, ЭКСПО-2017 шеңберінде біздің ел осы саладағы жаңа технологияларды көрсете алады деп үміттенеміз», – деп атап кетті Ахметжан Есімов.

Қазіргі таңда, Италия «жасыл» технологияларды белсенді әзірлеп, отынды әртараптандыру саясатын жүзеге асыратынын атап кету керек. Италия секциясының комиссары елде 2015 жыл ішінде Италияда электр энергиясын өндіруде ЖЭК үлесі 38,4% құрағанын мәлімдеді. Перспективалы даму артықшылығы ретінде Италия үкіметі жел және күн энергетикасын ынталандырудан көреді. Қазіргі уақытта елде гелиоэнергиясын өндіретін 150 мың кәсіпорын жұмыс істейді.

«Біздер біздің ұлттық павильонымызды толықтыруға белсенді түрде дайындалып жатырмыз, себебі ЭКСПО-2017 әлемде балама энергияның келешек дамуы үшін елеулі мәнге ие», – деп атап кетті Стефано Раваньян.

Оңтүстік Корея балама және жаңартылатын энергия көздерін көрсетуге дайындығын білдірді. Ол туралы ЭКСПО-2017 қатысу жөніндегі шартқа қол қою барысында Корея секциясының комиссары, Кореч Республикасының ҚР Төтенше және Өкілетті елшісі Чо Енг Чон мәлімдеді.

«Корея ЭКСПО шеңберінде Көрмені екі рет өткізді. Жуырда ғана 2012 жылы Йосу қаласында, сондай-ақ 1993 жылы Тэджон қаласында өтті. ЭКСПО өткізгеннен кейін ол бүкіл Кореяның ғылым мен технологиялар дамыту орталығы болды», – деді Чо Енг Чон.

Кореяда ЖЭК 2008 жылдан бері дамып келеді. Үкімет 2030 жылға қарай жаңартылатын энергия көздерін 11%ға артыру бойынша жоспар әзірледі. 76%-дан астамы жаңа және жаңартылатын энергия қоқыс қалдықтарынан өндіріледі, осындай өндірістен шығындар күн энергиясын өндіруден 10% және жел энергиясын өндіруден 66% құрайды. Қоқысты қайта өңдеу жолымен энергияны алу жаһандық жылу салдарымен күрес бойынша Оңтүстік Кореяның энергетикалық саясатының тиімді шаралары ретінде қарастырылады.

«Астана ЭКСПО-2017» халықаралық мамандандырылған көрмеге қатысушы елдердің тізімін құрастыру процедурасы екі бөліктен тұрады – қатысуы туралы ресми растау, содан кейін қатысу туралы шартқа қол қою.

Қазіргі сәтте 94 ел ЭКСПО-2017 өздерінің қатысуын ресми растады, ал 56 ел өздерінің қатысуы туралы шартқа қол қойды.

Дереккөз: www.24.kz

Атырауда ел Тәуелсіздігінің 25 жылдығына орай Жайық өзеніне 25 мың бекіре балығы жіберілді.

Бағалы балық Орал-Атырау балық зауытында өсіріледі. Бұл кәсіпорынға өндірістік кооперативтер де көмек береді. Олар ауға түскен бекіре балығын уылдырық шашуы үшін зауытқа тапсырады. Мамандардың айтуынша, ұсақ балықтың салмағы 4 грамм шамасында. Яғни табиғи жағдайға бейімделе алады. Олардың 3-4%-ы жетіліп кетсе, соның өзі үлкен жетістік, -дейді зауыт өкілдері. Бекіре балығы Жайық өзені арқылы Каспий теңізіне түсуі тиіс.

Өтеген Есалиев, балықшы:

– Биыл 131 бас қызыл балық аулап тапсырдық. Бүгінгі күні 25 мың шабақ содан шыққан балықтар. Жіберген балығымыз аман-есен теңізге барып, өсіп-өніп қайтуына тілектеспіз. Қазақстан Республикасының 25 жылдығы құтты болсын. Аман болайық.

Дереккөз: www.24.kz

Ақтауда «Қазазот» зауыты кешенді жаңғыртудан өтіп жатыр.

Жақында бұл жерде аммиакты кәдеге жарататын құрылғы орнатылып, газ-піспек электр стансасы салынады. Бұл аммиак пен азот минералды тыңайтқыштардың өндірісін жылына 400 мың тоннаға дейін ұлғайтуға мүмкіндік береді.Қазазот – Қазақстандағы химия өндірісіндегі жетекші кәсіпорындарының бірі. Аммиак пен аммиак селитрасын өндіретін жалғыз зауыт. Осы жылдың бірінші тоқсанында мұнда өндірілетін азот минералды тыңайтқыштардың экспорты 35 мың тоннаны құрады. Ал жыл соңында бұл көрсеткіш екі есе өседі деп күтілуде.

Ерлан Құдашев, аммиак өндірісі бойынша цех басшысы:

– Бұл цехта дәл қазір 120 адамдай жұмыс істейді. 4 ауысым бар. Әр ауысымда 10-12 адамнан. Күнделікті 24 сағат бойы тоқтамай жұмыс жасайды.

10 жыл бұрын бұл жер құлдырап тұрған болатын. Жұмысшылар бірнеше ай жалақысын ала алмай әлек болды. Ал 2011 жылы кәсіпорын Индустриаландыру картасына еніп, екінші тынысы ашылды. Мемлекеттік бағдарлама аясында зауытты қалпына келтіру үшін 9 млрд теңгеден астам ақша бөлінген болатын. Қазір өңірдегі ең ірі химия кешені «Шағырлы-Шөмішті» кен орнынан тасымалданатын табиғи газбен қамтылған. Бүгінде зауытта кешенді модернизация жүріп жатыр.

Кеңес Ұрақов, зауыт директоры:

– Алдымен 40 мегаваттық газ-піспек стансасын іске қосу жоспарда бар. Кейін танктен үрлеп тазартатын, газдан аммиак алатын құрылғы мен жазылу мұнарасын салуды көздеп отырмыз. Мұның бәрі өнім сапасын арттырып, шығындарды азайтуға мүмкіндік береді. Енді жылына 350-380 мың тонна өнім аламыз.

Бұл мақсатқа 56 млрд теңге бағытталған. Оның 70 пайызын Қазақстанның даму банкі береді. Қарыз мерзімі 10 жыл. Айту кеткен жөн, жоба Индустриалды-инновациялық даму бағдарламасы аясында жүзеге асады.

Авторлары: Ж.Біркенов, Т.Степанова, С.Бекбаев.

Дереккөз: www.24.kz

Италия мен Оңтүстік Корея «Экспо-2017» көрмесіне қатысады.

Бүгін елордада қос мемлекет комиссарлары «жасыл» энергетика саласындағы тың жетістіктерін дүниежүзілік шарада таныстыру туралы құжатқа қол қойды. Бас-қосу барысында тараптар жаңартылған энергия көздері жайлы пікір алмасты. Ал Италия комиссары Стефано Раваньян «Экспо» көрмесін өткізген мемлекет ретінде оң тәжірибесін ортаға салды. Айта кеткен жөн, бұл ел қажетті энергияның 38 пайызын табиғи тәсілмен өндіреді. Ал Оңтүстік Кореяда бұл көрсеткіш сәл аз болғанымен қоқыстан да қуат алынып отыр. Оның үстіне бұған дейін екі бірдей Экспо көрмесін өткізді. Сөйтіп келер жылғы шараға 94 мемлекет ресми түрде қатысатынын растап, 56-сы келісім-шартқа қол қойды. Бұл тізім жыл аяғына дейін 100-ге жетуі тиіс.

Стефано Раваньян, Италияның ҚР Төтенше және Өкілетті Елшісі:

– Былтыр Италияда ЭКСПО көрмесі «Азық-түлік қауіпсіздігі» тақырыбында өтті. Келер жылы Астанадағы ЭКСПО-да энергия мәселелері көтеріледі. Бұл екі тақырып бүгінде өзекті. Негізі осындай ұлық шараны ұйымдастыру көп еңбекті талап етеді. Сондықтан біз өз тәжірибемізбен бөлісуге дайынбыз. 

Чо Енг Чон, Оңтүстік Кореяның ҚР Төтенше және Өкілетті Елшісі:

– Соңғы 40 жылда Оңтүстік Корея индустриаландыруды дамыту мәселесіне баса назар аударып отыр. Енді біздің үкімет басқа да салаларға ден қоюы керек деп санаймын. Бұл жаңа технологиялар, ғылым, баламалы энергия көздері, оның ішінде күн және жел энергиясы. Сол себепті біздің компаниялар Астанадағы ЭКСПО арқылы шетелдік әріптестеріне өзінің тәжірибесі мен жетістіктерін көрсетуге үмітті.

Дереккөз: www.24.kz

Әлемдегі ең ежелгі және ең үлкен ағаштар – секвойялардың көмегімен жер бетіндегі климатты толығымен өзгертуге болады.

АҚШ ғалымдары осындай жаңалық ашып отыр.

Калифорния штатындағы Сьерра-Невада таулы аймағында зерттеу жүргзіетін мына альпинистер адам баласы үшін маңызды миссия атқаруда. Олар әлемдегі секвойя ағаштары арқылы жер бетіндегі климатты түбегейлі өзгертуге болады деп сенеді. Бұл мақсатқа мамандар жас бұталарды пайдалануда. Игі шараға табиғатты қорғау жөніндегі жергілікті үкіметтік емес ұйым мұрындық болған. Бұл алып ағаштар жер бетінде 30 ғасыр бұрын пайда болған. Секвойя бойы мен ені қатар өсетін ерекше өсімдік. Олардың ұзындығы 110 метрден асып, ені 7 метрге жетеді. Салмағы да ірі – 2 мың тоннаға дейін басады. Ғалымдардың айтуынша, осындай үлкен қасиеттерге ие алып ағаштар ауа қабатында түзілген зиянды газдарды үлкен көлемде сіңіруге қабілетті. Мұндай артықшылық қазіргі ғаламдық жылыну кезінде ауадай қажет.

Джейкоб Миларк, Табиғатты қорғау үкіметтік емес ұйымының директоры:

– Бұл ағаштардың генінде айрықша қасиет бар деп білеміз. Әсіресе, бұл ерекшелік ғаламдық климат өзгеріп, адамзат дамуына айтарлықтай қауіп-қатер төндіре бастаған бүгінгі заманда көмегі зор болады деп есептейміз. Секвойялардың 3 мың жыл бойы жойылмай, қасқайып тұрғаны генінде айрықша қасиет барын көрсетеді.

Джим Кларк, альпинист:

– Біз мына бұтақтарды секвойяның 70 метр биіктігінен алдық. Осы материалды жинау үшін алып ағаштардың ұшар басына шығамыз. Мұны биологиялық ғажайып деп атауға болады. 3 мың жыл бұрын өсіп-өнген ағаштың бір уыс тіні дәл осындай талды өсіріп шығарады.

Кларк бұл бұтақтарды Мичиган штатындағы зертханаға өткізеді. Онда көшеттерді мамандар құнарлы заттармен байытылған арнайы контейнерге отырғызады. Әрі қарай олар күлгін түсті жарықтың аясында тиісті ылғал мен температурада өсіп-өнеді. Өкінішке орай, осындай ерекше жағдай қарастырылғанымен, көшеттердің көбі өркен жая алмай, өліп қалады. Мамандардың бұл іспен айналысып келе жатқанына 20 жылдың жүзі болған. Осы уақыт аралығында бұл ұйым 170 көшет өсіріп, олардан алынған 300 мың тұқымды әлемнің 7 елінің аумағына еккен. Бірақ саны азайып қалған алып ағаштардың ғаламдық жылынудың бетін қайтарып, ауа температурасын қайта салқындатуға шамасы жетеді дегенге күмәнмен қарайтын мамандар да бар.

Тод Доусон, биолог:

– Қазір жер бетіндегі ғаламдық жылыну үдерісі жылдам жүріп жатыр. Сондықтан осыған сай шешімдер тез қабылданып, қысқа мерзімде жүзеге асатындай болуы керек. Ал баяу өсетін өсімдік бұл міндеттің үдесінен әсте шыға алмайды.

Бұл тұрғыда Доусонның мәселені шешуге байланысты өз ұсыныстары бар. Ол ғаламдық жылынуды тежеу үшін жанармай ретінде пайдаланылатын шикізат отынын өндіруді шектеу керек деп есептейді. Сонымен бірге, биологтың пайымынша, жер бетінде зор аумақты алып жатқан тропикалық ормандарды сақтау анағұрлым ұтымды тәсіл болар еді. Ал секвойяның пайдасына сенетін топ АҚШ-тың батыс бөлігіне барып, алып ағаштың мың данасын егуді жоспарлап отыр.

Авторлары: Ернат Қашқынов, Әсет Толыбаев

Дереккөз: EXPO-2017 Astana

«Астана ЭКСПО-2017» ұлттық компаниясы отандық туроператорлармен бірлесе отырып, мазмұны жағынан маңызды әрі мейлінше қызықты түрлі экскурсия маршрутын әзірледі. Демек, көрмеге келген әрбір турист астанамыздың көрікті жерлерімен танысып қана қоймай, Қазақстанның тарихи және мәдени нысандарын көру мүмкіндігіне ие болады.

Бүгінгі таңда туристік тізімге еліміздің ұлттық парктері (Шыран шатқалы, Бурабай және т.б.) бойынша экологиялық турлар, БҰҰБҒМҰ (ЮНЕСКО-ның) бүкіләлемдік мұралар тізіміне кіретін тарихи-мәдени нысандарды (Қожа Ахмет Яссауи, Тамғалы және т.б.) аралау маршруттары, сондай-ақ, «Байқоңыр» ғарыш айлағында ракетаның аспанға ұшырылуын бақылау және т.б. арнайы турлар ұйымдастырылды.

Өңірлердегі туристік қызмет көрсету спекторын кеңейту Астана қаласында өткізілетін Халықаралық мамандандырылған «ЭКСПО-2017» көрмесінің аясында жүргізіліп жатыр. Бұл қазақстандық трэвел-индустрияның дамуына ықпал етері анық.

Айта кету керек, 2016 жылдың 10 маусымынан бастап «Астана ЭКСПО-2017» көрмесіне билеттер сатыла бастады. Қазіргі таңда туроператорларға арнайы тиімді баға қойылып отыр. Яғни 2016 жылдың 10 шілдесі мен 10 тамызы аралығындағы промо кезеңде туроператорлар көрмеге билетті арнайы бағамен сатып ала алады.

Базалық пакет 2000 теңгеден басталып, күні белгіленген немесе күні белгіленбеген билеттерден құралады. Сатып алатын билет көлемін неғұрлым ұлғайтқан сайын, билет құнына деген жеңілдік те соғұрлым тиімді болады. Сатып алынатын билеттердің көлеміне шектеу қойылмайды.

Толығырақ ақпарат алу үшін  көрменің ресми билеттік операторының ресми сайты – tickets.expo2017astana.com ақпарат қалдыруға болады.

Семинарда 13 маман оқытылды, соның ішінде:

• табиғатты пайдаланушы кәсіпорындардың мамандары – 8 адам;
• мемлекеттік мекемелердің мамандары – 3 адам;
• ЖОО және ҮЕҰ өкілдері – 2 адам.

Семинар қатысушылары ұсынылғандар: «Шығыстүстімет» ЖШС; «Транснефть Урал» АҚ; «Ақкент» ЖШС; «Қазпошта» АҚ; «ЗГМ ПЕНЕТРОН-ҚАЗАҚСТАН» ЖШС; «Астана су арнасы» ШЖҚ МКК; «Шығыс Қазақстан облысы табиғи ресурстар және табиғат пайдалануды реттеу басқармасы» ММ; «ҚР ЭМ МГК ЭР БМИК Қарағанды облысы бойынша экология департаменті» РМК; «Ақтөбе Орхус орталығы» ҚҚ; «Қарағанды мемлекеттік индустриалды университеті» ШЖҚ РМК.

Дәріс оқығандар:

Досмакова Бизара Жакиевна – ҚР ЭМ Қалдықтарды басқару департаменті директорының орынбасары;

Токтасынова Тоты Клышбековна – ҚР ЭМ МГК ЭР БМИК бас сарапшысы;

Абилова Ляйа Толегеновна – ҚР ЭМ МГК ЭР БМИК бас сарапшысы;

Ингербаева Жанат Умбетовна – ҚР ЭМ МГК ЭР БМИК бас сарапшысы;

Абдульманов Нургазы Сеильбекович – ҚР ЭМ «ҚОҚ АТО» ШЖҚ РМК АТД директоры;

Садвокасова Алия Малаевна – ҚР ЭМ «ҚОҚ АТО» ШЖҚ РМК МЭАҚД басқармасының басшысы;

Кондратенко Михаил Геннадьевич – ҚР ЭМ «ҚОҚ АТО» ШЖҚ РМК МЭАҚД ИРБ басшысы;

Балабаева Алтын Ибрагимовна – ҚР ЭМ «ҚОҚ АТО» ШЖҚ РМК МЭАҚД жетекші маманы.

Семинар аяқталарда білімді бағалауды өткізгеннен кейін ҚР Энергетика вице-министрі Ғ.Қ. Сәдібеков пен «ҚОҚ АТО» ШЖҚ РМК бас директорының м.а. А.А.Алдабергенов қол қойған куәліктер табыс етілді.

Дереккөз: www.24.kz

Ақтау қаласының тұрғыны Әбілхас Бесімбаев тереңдікте бұрғылап жұмыс істейтін әмбебап қондырғы ойлап тапты.

Өнертапқыш құрастырып шығарған техника күн және желдің күшімен жұмыс істейді. Оның айтуынша, бұл үнемді, экологияға еш зиянсыз, «Жасыл экономика» стандарттарына сай, сенімді құрал. Авторлық туынды патенттелген. Қазір тексеру, сынау жұмыстары жүргізіліп жатыр. Келешекте EXPO-2017 көрмесінде таныстырылады. Мұнай өндіруге арналған станок қазір сынақтан өткізіліп жатыр. Қондырғы айтарлықтай нәтиже көрсетуде. Өнертапқыш Әбілхас Бесімбаев бұрын мұнайшы болып жұмыс істеген. Ол бұл жобаға 30 жыл уақытын сарп етіпті. Көпшілік қойшы отбасынан шыққан жігіттің жоспарының жүзеге асатынына күмәнмен қараған. Оның идеясын Технологиялық даму жөніндегі ұлттық агенттік қолдап, 5 миллион теңге көлемінде грант бөлген. Тың туынды күн және желдің қуатымен жұмыс істейді. Бұл электр энергиясын 90%-ға үнемдеп, өнімділікті 30%-ға еселеуге мүмкіндік береді.

Әбілхас Бесімбаев, өнертапқыш:

– Мұнда екі негізгі технология қолданылады. Бірінші дөңгелек бұранда пайдаланылады. Ол сенімді әрі өте төзімді. 10 жыл көлемінде шыдас береді. Оған тежегіш жүйесінің де керегі жоқ. 20 тоннадан астам жүкті ұстап тұра алады. Екіншісі қарапайым түрлендіруші. Бұл мұнай өндіру ісіндегі технологиялық үдерісті басқарудың ең үнемді, әрі ыңғайлы жүйесі.

Қондырғының салмағы да жеңіл. Бар болғаны 3 тоннадай болады. Бұл қазіргі қолданыстағы станоктардан 4 есе кіші. Оның үстіне өзіндік құны шетелдік мамандар ұсынып отырған гидравликалық аппараттардан әлде қайда төмен. Өнертапқыштың ойындағысын жергілікті зауыттың қызметкерлері жүзеге асыруға қол ұшын берген.

Жақында қондырғының жұмысын іс жүзінде байқап көрмек. Ол үшін «Қаражанбас» кен орнынан бір ұңғыма бөлінген. Өнертапқыш жаңа қондырғының тиімділігіне және сынақтан сүрінбей өтетініне сенімді. Ал EXPO-2017 көрмесінде шетелдік инвесторларды таңқалдырамыз деп отыр. Қазірдің өзінде ресейлік мұнайшылар жобаға қызығушылық танытуда.

Авторлары: Руслан Бақытбекұлы, Тамара Степанова, Саламат Бекбаев

Дереккөз: АО “Қазақстан Темiр Жолы”

«Қазақстан темір жолы» ҰК» АҚ президенті Асқар Мамин жұмыс сапарымен Маңғыстау облысында болып, Құрық портындағы паром кешені құрылысы барысымен танысты.

Қазіргі таңда бұл аумақтан 3,9 млн текше метр жер қабаты босатылды.

Ерсай станциясындағы кіре беріс темір жол телімінен Құрық станциясына дейін 13 шақырымдық темір жолдың 9 шақырымына рельс торкөздері төселе бастады.

 Осы жолдар арқылы Батыс тұсынан толқындардың тосқауылдық қалқандарына қажетті 95 мың текше метр тас жеткізілді. Тәулігіне екі мың текше метр тас жеткізілуде. Жағалаудың табанын қазу арқылы тереңдету  үшін 800 мың текше метр теңіз түбіндегі топырақты шығару жоспарлануда.  Бұған әлемдік деңгейдегі танымал теңіз табанын қазатын Jan De Nul бельгиялық компаниясының қатысуымен жасалады.

Тамыздың ортасына дейін үш секциялы көпірдің көтеру- өткізу металл қаусырмалы көпірінің алғашқы партиясы жеткізіледі.

Қазіргі кезде бірқатар нысандардың құрылысы басталды. Оның ішінде әкімшілік, инженерлік, диспетчерлік қызмет, кеден және шекаралық бақылау орындары жасалуда.

Биылғы жыл аяғына дейін кешеннің алғашқы бөлігін іске қосу жоспарланып отыр. Бұл паром кешеніндегі Құрық порты арқылы жүк қабылдап жөнелтуді іске қосудың алғашқы техникалық және технологиялық дайындығы жасалады.

Нысанның екінші бөлігіндегі құрылыстарды аяқтау 2017 жылға жоспарланып отыр.

Құрық  портындағы жаңа паром кешені тәулігіне бес паромға қызмет көрсетеді. Сол арқылы жылына 4 миллион тонна жүкті өңдейтін болады.

Құрық портындағы ауқымды жұмыстар мен Боржақты-Ерсай темір жол желісі басты жүктер мен сұйық жүктерді мультимодальдық тасымалдауға арналады. Бұл өз кезегінде Каспий өңіріндегі батыс бағдардың экспорттық әлеуетін арттырады.

Құрық паром кешені «Нұрлы жол» бағдарламасы аясындағы нысан  ретінде Қазақстанның транзиттік көліктік әлеуетін көтереді. Ұлы Жібек жолының дамуына ықпал етеді.

«Қазақстан темір жолы» ҰК» АҚ баспасөз қызметі