Ақтөбе облысындағы бекіре шаруашылығы қара уылдырық өндіре бастады

Дереккөз: www.24.kz

Балық санын көбейту үшін уылдырықты бұрын Ресейден тасымалдайтын.

Шаруа бірнеше рет шет елдерден мамандар шақырып, балық өсірудің қыр-сырын меңгерген. Енді сол қыруар еңбектің арқасында өз өнімін ала бастады. Қарғалы ауданында орналасқан қожалық балық шаруашылығын 2006 жылы қолға алды. 19 жерден жасанды тоған қазып, Ресейден бекіретұқымдас балық түрлерін сатып әкелді. Аса бапты қажет ететін бағалы балықтарды күзде санап, қысқы тоғанға көшіреді. Сапалы уылдырық алу үшін дәрумен қосылған жем береді.

Биыл жазда жемге Каспий майшабағын қосқан. Нәтижесінде бекіре балығы 400 келіге дейін салмақ қосыпты. Бүгінде кәсіпкердің балалары мен немерелері де осы кәсіпке ден қойған. Отбасылық бизнесті дамытуға мемлекет тарапынан қолдау бар. «Бизнестің жол картасы-2020» бағдарламасымен шаруашылыққа кіреберіс жол салынып, тоғанға су айдайтын құбырлар жүргізілді. Шаруашылықта жергілікті 30 адам еңбек етіп жүр.

Момынжан Қали, фермер:

– Инкубациялық цех салып жатырмыз. Соны аяқтасақ, 8 келіге дейін өнім аламыз. Келесі жылдың жазында цехты кеңейтіп, қуаттылығын 25 келі өнім алуға жеткіземіз. Яғни 1 жылдан кейін қара уылдырық көлемі бірнеше есеге өседі. Ал 4 жылдан кейін 200 келіге дейін бекіре уылдырығын аламыз деген жоспар бар.