ОҚО-да биыл жылыжай аумағы 200 гектарға ұлғаяды

Дереккөз: www.24.kz

Оңтүстік Қазақстан облысында биыл жылыжай көлемі 200 гектарға ұлғаяды. Дәл қазір өңірдегі мұндай жабық кешендер 1325 гектар алқапты алып жатыр.

Бұл еліміздегі барлық жылыжайдың 80 пайызы. Олардың көпшілігі негізінен Сарыағаш, Қазығұрт, Түркістан, Ордабасы аудандарына тиесілі. Былтыр осы салада диқандар 114,3 мың тонна көкөніс жинаған. Оның ішінде, 62,6 мың тоннасы қызанақ, 51,7 мың тоннасы қияр.

Түркістандық шаруалар соңғы жылдары жылыжай өсіруден көш ілгері келеді. Кейбіреуі Оңтүстік Кореяның технологиясын меңгеріпті. Бұл кешен климат бақылаумен басқарылады дейді аграном Ғалымжан Шалтаев.  Яғни қандай температураға қойсаңыз жылу сол шамада сақталады. Әрі жанармайды үнемдеуге де сеп болады. Қазір 35 соттық бұл жылыжайда 12 мың түп балғар бұрышы егілген. Француздың фламинго сортынан алда 30-35 тонна өнім алу жоспарланып отыр.

Ғалымжан Шалтаев, агроном:

– Мұның басқа жылыжайдан ерекшелігі – сыртының өзі  3 қабатты. Көріп отырғаныңыздай, үш перде бар. Барлығы жабылады. Перде жабылған соң іші термос болады. Ыстық ауаны ұстайды. Бұл арқылы солярканы эконом жасаймыз. Жылу кетпейді.

Жылыжай баптағандар тұтынушыларды жыл он екі ай көкөніспен қамтамасыз ету үшін еңбек етуде. Қажетті көшеттерін де өздері егіп  алады. Дәл қазір Түркістан қаласы аумағында  65,73 гектарды құрайтын 570 бірлік жылыжайлар орын тепкен. Ендігі меже алдағы 5 жылда қаладағы жылыжайлар көлемін 100 гектардан ары асыру.

Тәжібек Мұсаев, Түркістан қаласының әкімі:

– Екі жылдың көлемінде соны 110 гектарға жеткізіп, оның ішінде өнеркәсіп үлгідегі жылыжайды 30 гектарға жеткізсек, өзімізді қала тұрғындарын толық қамтамасыз етіп, артық өнімдерді басқа облыстарға алыс-жақын шетелге шығаруға мүмкіндік болады.

Жылыжай шаруашылығын дамыту мақсатында қаланың индустриалды аймағы аумағынан арнайы 9,0 гектар жер телімі бөлініпті. Енді мұнда өнеркәсіптік үлгідегі жылыжай салу жоспарға қойылған.

Авторлары: Нұрбек Байбосын, Ерболат Әбіш, Нұрмахан Бекмұратов