Дерек көзі – gov.kz

«Қазсушар»РМК 2021 жылғы су тасқыны кезеңіне дайындық бойынша жоспарлы жұмыс жүргізуде. Осы бағытта нақты қандай шаралар қабылданып жатқаны туралы ҚР Экология, геология және табиғи ресурстар министрлігінің Facebook-тегі парақшасындағы тікелей эфирде «Қазсушар» РМК Бас директорының орынбасары Ерлан Сәдуақасов мәлімдеді.

Оның айтуынша, су тасқыны қаупінің алдын алу үшін кәсіпорын өткен жылдың күзінен бастап су қоймаларында бос сыйымдылықтар құру бойынша жұмыс жүргізуде.

«Біз бұл бағытта 2020 жылдың күзінен бастап жұмыс істеп келеміз. Сондай-ақ, бассейндік инспекциялармен, ТЖ өкілдерімен және әкімдіктермен бірлесіп гидротехникалық құрлыстарды көзбен шолып тексеру жүргіздік. ТЖ туындаған жағдайда құрлыс және басқа да инертті материалдардың, қаптардың қажетті қорлары дайындалды, тиісті арнайы техника бар, ЖЖМ дайындалды», – деп атап өтті спикер.

Ерлан Сәдуақасов хабарлағандай, «Қазсушар» РМК балансында республикалық меншіктегі 4953 су шарауашылығы және гидромелиоративтік объектілер бар, оның ішінде: 86 су қоймасы, 84 су торабы, 36 бөгет, 103 сорғы станциясы, 46 бас құрылыс, 3298 канал және басқа да су шаруашылығы объектілері.

«Барлық су қоймалары бекітілген кестеге сәйкес іске қосу режимінде жұмыс істейді және көктемгі су тасқынын қабылдауға арналған сыйымдылық қоры бар. Оларды жобалық көлемге дейін толтырған және үлкен тасқын сулар келген жағдайда олар транзиттік режимде жұмыс істейтін болады», – деп хабарлады Қазсушар басшысының орынбасары.

Ерлан Сәдуақасов Қазақстанда су тасқыны кезеңі оңтүстік өңірлерді қоспағанда, наурыз айының басында басталатынын, ал еріген су ақпанның басында келетін екенін атап өтті.Су тасқыны маусымының сәтті өтуі ауа-райы жағдайларына және су тасқынына қарсы уақытылы қабылданған шараларға тікелей байланысты.

«Ақпан айында Қазгидромет ылғал қорының көлемі мен топырақтың қату тереңдігі туралы ақпаратты ұсынады. Бұл көктемгі су тасқыны қаупі бар аймақтарды анықтайды. Сондай-ақ, олардың мәліметтері негізінде біз су қоймаларының жұмыс режимін түзетеміз. Бұл қауіпті гидрологиялық құбылыстарды дер кезінде анықтау, гидротехникалық құрылыстардың жағдайын бақылау үшін жасалады», – деп түйіндеді ол.

Дерек көздер – egov.kz

Қазақстан туристік асссоциациясының (ҚТА) басшысы Рашида Шәйкенова «Іле-Алатау» МҰТП-да экотуризмді дамыту жобасына қолдау білдірді. Бүгін Аюсай шатқалындағы ұлттық паркте туристер үшін Қазақстандағы алғашқы сапар орталығының ашылуында ол экологиялық талаптарға сәйкес елдің ұлттық парктерінде қажетті инфрақұрылым құрудың маңыздылығына назар аударды.

«Біз мұндай жобаларды, ең алдымен, адамдармен және олардың саяхаттау қажеттілігімен байланыстырамыз, – деді Рашида Шәйкенова. – Аюсай – алматылықтар үшін танымал бағыт, сондықтан мұнда туристер саны өте көп. Олардың осында болуы экологиялық туризм тұрғысынан өркениетті, сауатты, ұстамды болуға тиіс».

ҚТА басшысы волонтерлікті дамыту бойынша ұлттық парктермен ынтымақтастыққа дайын екендігін білдірді.

«Ұлттық парктерге осындай көмек қажет, қаладан қашық орналасқандықтан онда кадрлармен байланысты үлкен проблема бар, оған туристік білімі, маркетинг және IT саласындағы білімі бар мамандар баруы тиіс,- деп атап өтті Рашида Шәйкенова. – Сондықтан біз бұрын студен жастармен волонтерлікті дамыту бойынша жұмыс істей бастадық. Ол кезде біз аз адамдарды ғана тарта алдық, қазір жағдай өзгеруде, адамдар мұндай қоғамдық жұмысқа дайын. Азаматтық қоғам табиғатты, біздің ұлттық байлығымызды сақтауға қызығушылық таныта бастады. Мұндай жұмысқа атсалысқысы келетін адамдардың тобы пайда болды. Сондықтан біз қазір адамдар жинайтын жер таза емес, қоқыс тастамайтын жер таза екенін түсіну үшін «Тамыр» жабайы табиғатта болу мектебімен бірлесіп, туризм мен еріктілікті дамыту, ұлттық саябақтарды қолдау, экологиялық ойлауды қалыптастыру саласында белсенді түрде жұмыс істеп жатырмыз».

Рашида Шәйкенованың айтуынша, қазақстандықтар пандемия болғандықтан ғана емес, туған табиғатының құндылығын түсінгеннен кейін де Қазақстан ішінде саяхаттауға көбірек қызығушылық танытуда.

«Өткен жылдың наурыз айында карантин, авиаұшуларды шектеу, шекараларды жабу жағдайларында біз ішкі туризмді дамытуға сүйендік және бізде өте жақсы динамика бар. Қазақстандықтар басында амалсыздан, содан кейін туған елінің тамаша табиғи көрікті жерлеріне қуана-қуана барды. Оларға демалыс күнгі турлардың көмегімен табиғатқа шығып, отбасымен демалуға, таза ауамен тыныстау  арқылы жаңа орындарды танып-білуге болатындығы жайлы түсінік қалыптасты. Шынын айту керек, әзірге туркомпаниялар қызметінің құндылығын барлығы бірдей түсіне бермейді, дегенмен демалысты кәсіби ұйымдастыра алу соған  тұрарлық», – деп атап өтті Рашида Шәйкенова.

Дерек көз – egov.kz

Алматыдағы «Іле-Алатау» мемлекеттік ұлттық табиғи паркіндегі алғашқы визит-орталық жұмысын бастады. Аюсай шатқалында орналасқан орталық келушілерге ұлттық парк жайлы толық ақпарат ұсынатын, білім берумен және ағарту жұмысымен айналысатын кешенге айналмақ.

Бүгін оны таныстыру шарасына ҚР Экология, геология және табиғи ресурстар министрлігі Орман шаруашылығы және жануарлар әлемі комитетінің төрағасы Асхат Қайнарбеков, қоғам белсенділері, ұлттық паркте экотуризмді дамыту бойынша құрылған Қоғамдық кеңес мүшелері мен БАҚ өкілдері қатысты.

«Жалпы Іле-Алатауға 2019 жылы 300 мыңға жуық адам келді. Әрине, былтыр пандемияға байланысты туристер аздау болды. Инфрақұрылымды дұрыстау арқылы осы туристер ағынын реттеу керек. Ал визит-орталықтың салынуы экологиялық туризмді өркендетіп, табиғат ескерткіштері туралы ақпарат беріп, дұрыс бағыт сілтеуге, қоршаған ортаға ұқыпты қарауды насихаттауға мүмкіндік ашады. Флора мен фауна туралы туралы балаларға көбірек түсіндіруге, сабақтар өткізуге мүмкіндік туып отыр», – деді нысанның маңыздылығы туралы «Іле-Алатау» мемлекеттік ұлттық табиғи паркінің Бас директоры Дамир Малгелдиев.

Визит-орталықтың модулі экологиялық материалдардан – отандық ағаш конструкциядан жасалған. Ғимараттың негізіне бетон құйылмай, оның орнына металл байлауы бар геобұрандалардан қойылды. Жобаны танымал сингапурлық архитектор дайындаған. Ғимарат Аюсай шатқалының ландшафтына үйлесіп тұр. Визит-орталық WI-FI интернет желісіне қосылған.

«Аюсай» визит-орталығы үш модульден тұрады. Әр модуль шамамен 200 шаршы метрден тұрады. Ғимарат толығымен ағаштан және әйнектен тұрғызылды. Американдық технологияны қолдана отырып, жеңіл конструкция түрінде құрастырдық. Іле-Алатаудағы экотуризмді дамыту жобасы аясында тағы да 4 шатқалда 6 визит-орталық салынбақ. Осы жылы үшеуін Үлкен Алматы көлін маңында, Бутаковкада және Түрген шатқалында тұрғызуды жоспарлап отырмыз», – деп атап өтті «Turanga Group» компаниясының басшысы Александр Гужавин.

Аюсай шатқалына инфрақұрылым жасалмас бұрын ұлттық парк қызметкерлері Қазақ ұлттық университетімен және Зоология институтымен бірлесіп экологиялық мониторинг жүргізіп, қоршаған ортаға түсетін рекреациялық жүктемені есепке алған. Әзірге техникалық режимде жұмыс істеп тұрған визит-орталық қаңтар айынан басынан бері 300-ге жуық адам қабылдап үлгерді.

Шатқалда қоршаған ортаға зиян келтірмей әрі қауіпсіз демалудың негіздерін түсіндіру үшін «Тамыр» жабайы табиғатта болу мектебі жұмыс істеп жатыр. Онда волонтерлер мен кәсіби альпинистер тегін лекциялар жүргізеді. Визит-орталық ішінде экологиялық сабақтар үшін арнайы зал да ашылды.

Визит-орталық қызметінің негізінде Мемлекет басшысы Қасым-Жомарт Тоқаевтың экотуризмді орнықты дамыту идеясы туралы мәлімдемесі жатыр. Себебі оның салынуын парк аумағында эко-туризмді өркендетуге бағытталған инфрақұрылымның алғашқы баспалдағы деп атауға болады. Жалпы «Turanga Group» экотуризмді дамыту жобасы аясында төрт жыл ішінде 155 км жаяу жүру соқпағы жөнделіп, 17 жаңа жаяу және велосипед жолдары ашылмақ. Бұдан бөлек 10 глэмпинг, 2 кемпинг, 1 этноауыл мен 1 караванинг тұрғызылады.

Осы тәжірибені пайдалана отырып, Алматы облысындағы өзге де ұлттық парктерде визит-орталықтар тұрғызу жоспары бар.

Дерек көз – www.gov.kz

Экология, геология және табиғи ресурстар министрі Мағзұм Мырзағалиев Қарағанды облысының Теміртау қаласы бойынша мемлекеттік экологиялық инспекторы Абылай Қабдырашты қабылдады. Жас маманға өңірдегі экологиялық проблемалар мен қоршаған ортаға қатысты құқықбұзушылықтар туралы мәліметтерді жедел жеткізіп отыру қажеттігін айтты.

«Теміртаудың халқы, қоғам өкілдері өте белсенді. Сол халықпен, БАҚ-пен жұмыс істеу керек. «Арселор Миттал» сияқты ірі кәсіпорындармен тығыз байланыста болып, жұмыстарын қадағалауы керек. Сондықтан бұл өте жауапты жұмыс»,- деді министр кездесуде.

Айта кетейік, Қазақстанда бұрын жекелеген қалаларда экологиялық инспектор қызметі болмаған. Теміртауда бұл қажеттілік қаланың нашар экологиялық жағдайы әсерінен туындап отыр. 2020 жылы Теміртау қаласының экологиялық проблемаларын кешенді шешу бойынша Жол картасы қабылданған. Ауаға ластаушы заттарды негізгі шығарушы – «АрселорМиттал Теміртау» АҚ шығарындыларды азайту бойынша 23 іс-шара атқаруы тиіс. Сонымен бірге қалада 500 мың ағаш отырғызу туралы келісім жасалған.

Дерек көз – www.egov.kz

ҚР Үкіметінің Қаулысымен Экология, геология және табиғи ресурстар министрлігінің құрамында Балық шаруашылығы комитеті құрылды. Саланың жеке ведомствоға біріктірілуі жақында қабылданған балық шаруашылығын дамытудың 2030 жылға дейінгі мемлекеттік бағдарламасын тиімді жүзеге асыруға, балық өсіру, тұтыну және экспорт көлемін жоспарға сай арттыруға мүмкіндік береді. Мемлекет басшысы 2020 жылдың қыркүйек айындағы Жолдауында Қазақстанның балық шаруашылығындағы әлеуеті зор екенін ескере отырып, оны дамытуға аса мән бере қажеттігін айтқан.

Еске салайық, елімізде Ауыл шаруашылығы министрлігіі құрамында болған Балық шаруашылығы комитеті 2014 жылы таратылған. Одан бері балық ресурстарын қорғау, тиімді пайдалану және көбейту саласындағы мемлекеттік саясатты Экология министрлігінің Орман шаруашылығы және жануарлар әлемі комитеті жүргізіп келеді. Салаға қатысты міндеттердің комитет пен жергілікті атқарушы органдардың және балық шаруашылығындағы өзін өзі басқару субъектілерінің арасында бөлінуі орталықтандырылған түрде тиімді жұмыс істеуге кедергі келтіреді.

Ал жұмысты жүйелі түрде жүргізу арқылы мемлекеттік бағдарламада көрсетілгендей су ресурстарындағы балық өсіру көлемін 600 мың тоннаға жеткізуге болады. Балық экспортын 300 мың тоннаға дейін арттыру жоспары да бар. Ол үшін 545 жаңа балық шаруашылығы құрылып, 323 шаруашылық толық жобалық қуатына шығады. Қазіргі уақытта жаңа комитеттің алдында мемлекеттік бағдарламаның жүзеге асуына жол ашатын саланы мемлекеттік қолдау аясын кеңейту, заңнаманы жетілдіру, балық жемі өндірісін жолға қою, кадрлық қамтамасыз ету жұмыстарын атқару міндеттері тұр.

Дереккөз – www.gov.kz

Қазақстанда жасыл желекпен ұдайы толықтырып отыру мен ағаш егудің Кешенді жоспары дайындалуда

Бұл туралы бүгін Орталық коммуникациялар қызметіндегі Мемлекет басшысының Жолдауындағы тапсырмаларды орындауға арналған іс-шаралар туралы брифингте ҚР Экология, геология және табиғи ресурстар министрі Мағзұм Мырзағалиев айтты.

«Ел аумағын жасылдандыру мақсатында министрлік пен әкімдіктер 5 жыл ішінде орман қорында 2,0 млрд және елді мекендерде 15 млн ағаш отырғызады. Бұл үшін министрлік облыстық әкімдіктермен бірлесе жұмыс жүргізіп, аймақтарға егілетін ағаш көлемі белгіленді. Әсіресе, Қызылорда, Жамбыл, Түркістан облыстарының шөлді жерлерінде ағаш санын көбейтуге назар аударылады. Қызылордада 213 мың гектарға 177,5 млн, Түркістан облысында 227,6 мың гектарға 264,9 млн, Жамбылда 112,1 мың гектарға 138,9 млн түп ағаш егіледі. Бұдан бөлек, ұлттық парктер мен автомобиль, теміржол бойларында көшеттер отырғызылады. Қазір Премьер-министр Асқар Маминнің тапсырмасымен ағаш егу және жасыл желекпен ұдайы толықтырып отыру бойынша Кешенді жоспар дайындалуда», – деді министр жасылдандыру шаралары туралы.

Министр Қазақстан орман аумағы аз мемлекет болғандықтан, бұл шаралардың аса маңызды екенін атап өтті.

«Бұл басымдыққа ие тапсырмалардың бірі. Орман – біздің байлығымыз. Оның ресурстарын сақтап, көбейту маңызды. Мемлекеттік орман қорының аумағы 30 млн гектар, ол ел аумағының 11%-ын құрайды. Орман жамылғысы – 4,8%. 2030 жылға қарай ормандылық аумағын 5%-ға дейін көбейтуді жоспарлап жатырмыз», – деді министр.

Еске сала кетейік, Мемлекет басшысы Қасым-Жомарт Тоқаев орман қорында 2,0 млрд және елді мекендерде 15 млн ағаш егу туралы тапсырманы 2020 жылдың қыркүйек айындағы Жолдауында берген болатын.

Ақпарат көзі – www.gov.kz

ҚР Экология, геология және табиғи ресурстар министрінің бұйрығымен Жанат Самат Қазақстан Республикасының Экология, неолог «Қоршаған ортаны қорғаудың ақпараттық-сараптамалық орталығы» ШЖҚ РММ Бас директоры болып тағайындалды.

Жанат Самат 1980 жылы Ақтау қаласында туған. 2001 жылы Есенов атындағы Ақтау университетін «Экономист» мамандығы бойынша аяқтады.

Қызметтік жолын 2001 жылы Маңғыстау облысы бойынша Салық комитетінің ірі салық төлеушілерді талдау және мониторинг бөлімінің бас салық инспекторы болып бастады. Әр жылдары өңірдің Салық комитетінде келіспеушіліктер және консультациялар бөлімінің, жер қойнауын пайдаланушылар аудиті бөлімінің, жеке тұлғалар аудиті бөлімінің бас салық инспекторы қызметтерін атқарды.

2005-2006 жылдары Алматы қаласында «Салық консалтинг» ЖШС консультант-аудиторы болып жұмыс істеді.

2008 жылы Маңғыстау облысының кәсіпкерлік және өнеркәсіп басқармасы бастығының орынбасары, 2009 жылы «Маңғыстау облысының энергетика және коммуналдық шаруашылық басқармасының Маңғыстау облысының тұрғын үй-коммуналдық шаруашылық жобаларын үйлестіру орталығы» ШЖҚ МКК директоры болып тағайындалды.

2010 – 2012 жылдары аралығында «Каспий «ӘКК «ҰК» АҚ басқарушы директор-аппарат басшысы, Басқарма төрағасының орынбасары қызметтерінде болды.

2014-2016 жылдары Қызылорда қаласында «Байқоңыр» Әлеуметтік-кәсіпкерлік корпорациясы» ҰК АҚ Басқарма төрағасы болды.

2019 жылы ҚР Экология, геология және табиғи ресурстар министрінің кеңесшісі қызметіне тағайындалды.

Ақпарат көзі – www.gov.kz

Құрметті достар!
Қазақстанның Тәуелсіздік күні мерекесімен құттықтаймын!
Тәуелсіздік алған күннен бастап Қазақстан өз мемлекеттілігін күшейтті, жаңа нарықтық экономика құрды. Ең бастысы – халқымыздың ынтымақ-бірлігін сақтадық!
Жоспарға негізделген және тұрақты даму стратегиясының арқасында мемлекетіміз әлемдік саяси қауымдастықтың беделді мүшесіне айналып, халықаралық дәрежеде беделге ие болды.
Келесі жылы Қазақстан Тәуелсіздігінің 30 жылдығы атап өтіледі. Бұл бәріміз үшін үлкен жетістік! Алдымызда прогрессивті даму мен инновациялық шешімдер қабылдауға үлкен мүмкіндіктер бар екеніне сенімдімін.
Бәріңізге зор денсаулық, отбастарыңызға амандық, береке-бірлік тілеймін
Ізгі ниетпен,
Қазақстан Республикасы
Экология, геология және табиғи ресурстар министрі
Мағзұм Мырзағалиев

Ақпарат көзі – www.gov.kz

Қазақстанның Экология министрлігінің басшысы Мағзұм Мырзағалиев сейсенбі күні Үкімет отырысында республиканың эко-белсенділерімен бірлесіп әзірленген өңірлердегі экологиялық ахуалды жақсарту жөніндегі жол карталарын таныстырды.

Экология министрлігінің басшысы қоршаған ортаны жақсарту бойынша маңызды шараларды қарастыратын Экологиялық кодекстің жобасы Мәжіліспен мақұлданып, Сенаттың қарауына жіберілгенін еске салды.

«Жаңа экологиялық кодекстің қабылдануын күтпей, «Халық үніне құлақ асатын мемлекет» тұжырымдамасына сүйене отырып, экологиялық проблемалар мен оларды жұртшылықпен, әсіресе барлық өңірлердегі экобелсенділермен шешу жолдары қаралды. Барлығы он жеті онлайн кездесу өткізілді. Жиырма бес мыңға жуық адам қатысты», – деді Министр.

Жұртшылықпен, әкімдіктермен және табиғат пайдаланушылармен бірлескен жұмыс нәтижесінде өңірлердің экологиясын жақсарту жөніндегі нақты шараларды көздейтін он жеті жол картасы әзірленді.

Мәселен, Қарағанды облысының экологиялық жағдайын жақсарту үшін дайындалған Жол картасында елу жеті іс-шара қарастырылған. Олардың арасында «АрселорМиттал Теміртау» кәсіпорнында қазандық және газ тазалау жабдығын қайта жаңарту, әк күйдіру цехын Теміртау қаласынан тыс шығару және Жезқазған қаласында «Қазақмыс» кәсіпорнының жаңа күкірт қышқылы цехын салуды айтуға болады. Бұл шаралар қоршаған ортаға теріс әсерді төмендетуге мүмкіндік береді. Сондай-ақ, Теміртау қаласында өндірістік ағынды суларды тазарту торабын және Балқаш пен Жезқазғанда жаңа кәріздік тазарту кешендерін салу, «АрселорМиттал Теміртау» қалдықтарын кәдеге жарату, Жезқазғанда биоэлектростанция салу және «Дарьял-У» жерлерін қалпына келтіру жоспарланған.

Алматы қаласы бойынша Жол картасында жиырма іс-шара қарастырылған. Олардың ішінде: ЖЭО-2 және ЖЭО-3 газға ауыстыру, қалаға іргелес жатқан жеке сектор аудандарын газдандыру, коммуналдық қызметтер мен қоғамдық көліктің автокөлігін сығылған табиғи газға ауыстыру, дизель отынымен қоғамдық көлікке кезең-кезеңімен тыйым салу, көгалдандыру және т.б.

Ақтөбе облысының жол картасында отыз үш іс-шара қарастырылған.

Өңірлік эко-белсенділермен барлық талқылаулар Экология министрлігі басшысының қатысуымен өтті.

Ақпарат көзі – www.gov.kz

Маңғыстау облыстық экология департаментіне өндіріс орындары аумағындағы 12 түрлі ластаушы көздерді анықтайтын дрондар сатып алынуда. Бұл туралы ҚР Экология, геология және табиғи ресурстар министрлігінің Facebook парақшасындағы тікелей эфирде өңірлік департаменттің директоры Руслан Төкенов айттты.

«Экология департаментіне соңғы үлгідегі дрон сатып алынып жатыр. Ол 12 түрлі ластаушы көздерді онлайн режимде анықтай алады. Жеті шақырым радиуста, үш жарым шақырым биіктікке ұшыруға болады. Видео, фотофиксациясы бар. Қазір аталған құрылғы сату-сатып алу процесінен өтіп жатыр. Келер жылдан бастап қолданысқа енгіземіз. Дрондарды көбіне өнеркәсіп кәсіпорындарының аумағында, зауыттардың, кен орындарының төңірегінде пайдаланамыз. Ерекше қорғалатын табиғи аумақтарда дрон қолданылмайды. Сондықтан шу мәселесі болмауы тиіс», – деп атап өтті Руслан Төкенов.

Айта кетейік, биыл Маңғыстау облысы бойынша кәсіпорындарға қоршаған ортаға келтірген зияны үшін 2,8 млрд теңге айыппұл салынып, оның 90% -ы өндірілген. Тікелей эфирдегі сұхбатта Руслан Төкенов өңірдегі экологиялық мәселелерді шешу бойынша бекітілген Жол картасына кеңінен тоқталды.

«Жол картасы жеті тараудан, отыз алты бөлімнен тұрады. Шығарындыларды азайту, көгалдандыру, қалдықтарды басқару, тарихи ластану орындарын реттеу, биоалуантүрлілікті қорғау және тағы да басқа экологиялық мәселелердің бәрі осы құжатқа енгізілген. Министрдің тапсырмасы бойынша, біз тоқсан сайын жергілікті халықпен кездесіп, атқарылған жұмыс бойынша есеп беріп отырамыз. Онда шешілген мәселелерді, шешімін таппаған дүниелерді баяндап, себебін де түсіндіреміз», – деді департамент басшысы.

Жақында Қазақстанның Қызыл кітабының сирек кездесетін және жойылып кету қаупі бар жануарлар тізіміне енгізілген Каспий итбалығының ахуалы да сұхбатқа арқау болды.

«Каспий жағалауынан кейде өлі итбалықтардың табылып жататыны жасырын емес. Көп жағдайда бұған итбалықтың браконьерлік ауға оратылып қалуы себеп болады. Биыл әкімдіктің қатысуымен теңіздегі біраз жер заңсыз аудан тазартылды. Егер бұл жұмыс жалғасса, оң нәтиже болатыны сөзсіз. Ал итбалықтардың Қызыл кітапқа енуі бізге жаңадан ерекше қорғалатын аймақтар құруға мүмкіндік береді», – деп атап өтті Р.Төкенов.

Өңірдегі қоқыс проблемасы туралы айтылғанда соңғы уақытта жұртшылық талқысына түсіп жатқан Бозжыра шатқалының тазалығы да назардан тыс қалмады.

«Есеп бойынша биыл Бозжыраға 2000 адам барған. Оның әрқайсысында өздерімен бір бөтелке су болды десек, жартысы саналы түрде бос бөтелкесін алып кетеді. Қалған мыңынан қалдық су жерде қалады. Алдағы жылы шатқалға он мың турист келеді деп күтілуде. Яғни, біз қоқыс мәселесін қазірден реттеп, оны тастайтын орындарды дайындап, қонақ үй салатын инвесторға міндет жүктеуіміз қажет. Жалпы қонақ үй Бозжыра шатқалынан алыс орналасса, экологиялық талаптар орындалса, жоба дайын болғанда халыққа таныстырылса, сонымен қатар айналада киелі орындар болғандықтан түнгі мезгілде тыныштық режимі сақталса бұл жобаға жұртшылықтың бәрі бірдей қарсы емес», – дейді департамент басшысы.

Сұхбат кезінде 105 млн тонна радиациялық қалдық төгілген Қошқар ата қалдық қоймасы, Шетпе маңындағы карьерлер, экологиялық мәдениет, жаңа Экологиялық кодекстің жергілікті жердегі ахуалды жақсартуға тигізетін септігі және тағы да басқа қордаланған проблемалар сөз болды.

Министрліктің баспасөз қызметі салалық комитеттер мен департаменттер, ведомствалық мекемелер өкілдерімен маңызды мәселелер жөнінде тікелей эфирлерді дәстүрлі түрде күн сайын өткізіп отырады.