Ақпарат көзі – www.inform.kz

ҚАРАҒАНДЫ. ҚазАқпарат – Қарағандылықтар демалыс күндері су қоймаларының жағалауынан қоқыс жинап, ағаш отырғызды. Экологиялық сенбіліктер Дүниежүзілік тазалық күніне (World Clean Up day) орайластырылды, деп хабарлайды ҚазАқпарат тілшісі.

Қарағандыда акция Федоров су қоймасында өтті. Оған еріктілер, экологиялық белсенділер, қоғам қайраткерлері, кәсіпорын қызметкерлері мен мемлекеттік қызметшілер қатысты. Жағалау аймағында тал егілді.

Облыстық табиғи ресурстар және табиғат пайдалануды реттеу басқармасының бастамасымен «Сұрыпта, тапсыр, қайта өңде!» атты акция ұйымдастырылды. Оған қатысушылар Тихоновка орманында қоқыс жинап, оны бірден сұрыптады. Қапқа пластик, шыны, алюминий және аралас қалдықтар бөлек салынды. Содан кейін мұның бәрі қайта өңдеуге жіберілді.

Экологиялық сенбіліктер барлық қалалар мен аудандарда өтті. Жезқазғанда Кеңгір су қоймасының жағалауы қоқыстан тазартылды.

Акция осы жылы өңірде жарияланған «Кеңгір – баршаның қамқорлығы» жобасының логикалық жалғасы болды. Жезқазғандықтар ортақ күш-жігермен жағалауды ретке келтіріп жатыр.

Ақпарат көзі – www.facebook.com/EcologyofKazakhstan

Қазақстанда жер үсті сулары сапасының интерактивті картасы жұмыс істейді. Бұл туралы Экология, геология және табиғи ресурстар министрі Мағзұм Мырзағалиев айтты.
“Бүгін Дүниежүзілік су сапасын бақылау күні. Қазақстанда мұндай бақылау 143 су нысандарында жүргізіледі“,- деп жазды министр өз Twitter парақшасында.
Министрдің сөзінше, жер үсті сулары сапасының интерактивті картасы өткен жылы әзірленді. Ол жерден барлық өзен-көлдердің су сапасын онлайн бақылауға мүмкіндік бар.
“Барша қазақстандықтарды ең бағалы табиғи ресурсымыздың бірі – суды сақтауға, оған ұқыпты қарауға шақырамын“,- деген Мағзұм Мырзағалиев.

Ақпарат көзі – www.inform.kz

НҰР-СҰЛТАН. ҚазАқпарат – Егер бұрын өтемдік қону «бірден беске дейін» болса, енді ол «бірден онға дейін» қағидаты бойынша жүзеге асырылады, деп хабарлайды ҚазАқпарат ІІМ әкімдіктің ресми сайтына сілтеме жасап.

Биыл елордада 30 мыңға дейін ағаш отырғызылады, барлық аудандарда жұмыс жүргізілуде. Бұл туралы Нұр-Сұлтан қаласының әкімі Алтай Көлгінов өзінің Instagram парақшасында жазды.

«Қалада біз ағаш отырғызу, жасыл белдеу қалыптастыру және экологиялық аймақтар құру бойынша белсенді жұмыс жүргізіп жатырмыз. Көшеттердің өсуі үшін бірнеше жыл қажет екендігі бәрімізге белгілі. Олар тиісті күтімді қажет етеді. Біздің коммуналдық қызметтер ауа-райының қолайсыздығына қарамастан, күн сайын олардың жағдайын күтіп, ұстап тұрады. Қала тұрғындары да өсімдіктерге жақсы күтім жасауы керек.

Өсімдіктерді сақтау үшін жасыл желектерді сақтау және қорғау ережелері күшейтілді. Осылайша, егер бұрын ағаш кесу кезінде өтемдік отырғызу «бірден беске дейін» болса, енді ол «бірден онға дейін» негізінде жүзеге асырылады.

Жалпы, биыл біз 30 мыңға дейін ағаш отырғызамыз, жұмыс елорданың барлық аудандарында жүріп жатыр. Жасыл белдеуде – 330 мыңға дейін жапырақты және қылқан жапырақты көшеттер және 3 мыңнан астам көшет. Барлығы жасыл белдеуде 10,2 миллионнан астам ағаштар мен 1,8 миллион бұталар (қарақат, құс шиесі, ырғай және ағаш) өседі.

Аулаларды, саябақтарды, алаңдар мен бульварларды абаттандыру кезінде, құрылыс кезінде біз аумақты көгалдандыруға ерекше назар аударамыз. Өсімдіктердің кеуіп кетуіне жол бермеу үшін суару жүйесі 20% -дан 90% -ға дейін қалпына келтірілді.

Мемлекет басшысы өзінің халыққа Жолдауында экологиялық туризмді дамыту маңызды міндет екенін атап өтті. Ол үшін біз экопарктер құру жұмыстарын жүргізіп жатырмыз, олар тек көрікті жерлерге айналмайды, сонымен қатар қала экологиясын айтарлықтай жақсартады », – деп жазды Алтай Көлгінов.

Ақпарат көзі – www.facebook.com/EcologyofKazakhstan

Қазақстанда 19 қыркүйекте «World cleanup Day» акциясы, яғни «Бүкіләлемдік тазалық күні» өтеді. Бұл тазалық акциясы әлемде 12 жылдан бері өтіп келеді. Өткен жылы 169 мемлекеттің еріктілері қатысып, өздері тұратын өңірдің көшелері мен саябақтарын, өзен-көлдері мен ормандарын қоқыс пен тұрмыстық қалдықтан тазартуға атсалысты. Биыл «Бүкіләлемдік тазалық күні» жалғасын табады. Барша қазақстандықтарды жаһандық акцияға қатысып, еліміздің тазалығына үлес қосуға шақырамыз.

Ақпарат көзі – www.facebook.com/EcologyofKazakhstan

Экология, геология және табиғи ресурстар министрі Мағзұм Мырзағалиевтің қатысуымен Шығыс Қазақстан облысының тұрғындарына өңірдегі экологиялық проблемаларды шешудің Жол картасының жобасы (драфт) таныстырылды.

Жол картасы бойынша алдағы жылдарға Риддер металлургиялық кешенінде атмосфералық сілтісіздендіру цехын салу, өндіріс орындарынан ауаға шыққан қалдыққа мониторинг жасаудың автоматтандырылған жүйесін енгізу, жеке секторды орталық жылумен жабдықтау жүйесіне қосу, облыс қалаларында ластаушы заттарға сараптама жасайтын заманауи зертханалар салу, ағаш отырғызу көлемін арттыру секілді 30-ға жуық іс-шара жоспарланған.

«Жергілікті халық қоршаған ортаның жағдайына байланысты істеліп жатқан жұмыстар туралы білуі тиіс. Сондықтан Жол картасын бірлесіп дайындауға шақырамын, біз барлық ұсыныстарды тыңдап, ескеруге дайынбыз. Жол картасы мазмұнды, жүзеге асатындай, бірақ амбициозды болуы керек. Өңірде проблемалар ондаған жылдар бойы жиналып қалғанын білесіздер. Сондықтан олар бірден шешіле қоймайды. Дегенмен өндірістік өңірдегі қоршаған ортаның жағдайын жақсарту үшін бар күшті салуымыз қажет»,- деді М.Мырзағалиев облыс жұртшылығымен өткен Zoom-конференцияда.
Жол картасы ұсыныстар қабылданғаннан кейін қоғам өкілдеріне қайта таныстырылады.

Онлайн-кездесуде эко-белсенділер мен ғалымдар атмосфералық ауаның ластануы, оған қатысты қабылданып жатқан шаралар туралы сұрақтар қойды. Пікірлерін ортаға салды. Экологиялық мониторинг посттарының санын көбейтуді сұрады. Министр Мырзағалиев Экологиялық кодексте нақты қадамдар көрсетілгенімен, өңірдегі қоршаған орта жағдайын реттеу бойынша жылдамырақ әрекет қажеттігін алға тартты.

«Еуропа «Ең озық қолжетімді технологиялар» (ЕОҚТ) арқылы экологиялық ахуалды жақсартуға 15 жыл жұмсағанын білеміз. Біз Экологиялық кодексте бұл мерзімді де ескердік. Бірақ жылдар бойы күтіп, қарап отыра алмаймыз. Барынша тезірек әрекет етуіміз керек. Халықпен, жергілікті атқарушы орган өкілдерімен бас қосып отырғанымыз да сол», – деп айтты М.Мырзағалиев.
Экология министрінің сөзінше, өткен жылы өндіріс орындарынан табиғатты ластағаны үшін жиналған эмиссия 90 млрд теңгедей болды. Оның 40 млрд-ы елдегі экологиялық жағдайды жақсарту шараларына бағытталған.

Ақпарат көзі – www.facebook.com

Бейсенбі күні Парламент Сенаты Көкжайлау шатқалы, Іле-Алатау мемлекеттік ұлттық табиғи паркі жері мен Бурабай мемлекеттік ұлттық табиғи паркі жерінің бір бөлігін ерекше қорғалататын табиғи аумақтарға қайтаруды көздейтін заң жобасын бірінші оқылымда мақұлдады.
Осылайша екі заң актісіне өзгеріс енгізілмек. Олар – Жер кодексі және “Ерекше қорғалатын табиғи аумақтар” туралы Заң.
«Бұл өзгерістер негізінен Көкжайлау шатқалын, Іле-Алатау мемлекеттік ұлттық табиғи паркі жерін және Бурабай мемлекеттік ұлттық табиғи паркі жерінің бір бөлігін қайтарып алуға байланысты”, – деді заң жобасын таныстырған Мәжіліс депутаты Роман Ким.
Құжаттың жаңа нормалары бұрын туризмді дамыту үшін ерекше қорғалатын табиғи аумақтар құрамынан шығарылып, қазір пайдаланылмай жатқан жерлерді қайтару процестерін жеңілдетуге мүмкіндік береді.
Өзгерістер қайтарылатын жерлердегі ерекше экологиялық, ғылыми, тарихи-мәдени және рекреациялық құны бар табиғи комплекстер мен табиғи қорық қорларын сақтап қалу мақсатында жасалып отыр.
Депутаттар заңға сонымен бірге табиғатты қорғау мекемелеріндегі көрсетілетін қызметтер аясын кеңейтетін түзетулерді де енгізді.

Ақпарат көзі – www.gov.kz

Экология, геология және табиғи ресурстар министрі Мағзұм Мырзағалиев Атырауда ірі балық өндіруші кәсіпорындардың өкілдерімен кездесті. «Орал-Атырау бекіре балық өсіру зауыты» РМКК-дегі шараға Атырау облыстық әкімдік өкілдері, «BD – Балық шаруашылығы қауымдастығы» ЗТБ, саладағы бірнеше кәсіпорын басшылары қатысып, балық шаруашылығындағы проблемалар көтерілді.

Министр Мырзағалиев балық шаруашылығында өңірдің алатын орны ерекше екенін, қазір мемлекет тарапынан бұл салағы көп көңіл бөлініп жатқанын атап өтті.

«Қазақстанда ауланатын балықтың отызға жуық пайызы (29,2 пайыз, 13,0 мың тонна) осы облысқа тиесілі. Каспийге құятын екі ірі балық шаруашылығы су айдындары – Жайық пен Қиғаш өзендерінде 20 табиғат пайдаланушы өз кәсіптерін іске асырып жатыр… Балық өсірумен қатар балық аулаудың атыраулық балықшыларға маңызды екенін біз есептен шығармаймыз. Әсіресе Каспийде теңіз балықтары игерілмей жатқанын ескерсек, өңірде балық аулау көлемін одан да арттыруға болады.. Осы шаруашылықтың дамуына серпін беретін ұсыныстар болып жатса, біз бірлесіп қарауға әзірміз», – деді министр.

Жиында кәсіпкерлер салықтық жеңілдіктер мен субсидиялау бойынша ұсыныстар білдірді. Министр бұл бастамаларды қолдайтынын жеткізді.

«Бұл мәселелер Қаржы, Ұлттық экономика министрліктері сияқты басқа да мүдделі мемлекеттік органдармен бірлесіп қарауды және келісуді талап етеді. Сондықтан біз тиісті өзгерістер енгізу үшін сіздің тараптан нақты есептер (расчеты) мен негіздемелер қажет. Орман шаруашылығы және жануарлар дүниесі комитетіне аталған мәселелерді сіздермен бірлесіп қарауды тапсырамын. Көтерілген мәселелер оң шешімін тапқан жағдайда балық шаруашылығының әлеуеті көтеріліп, кәсіпкерлердің жұмысы одан әрі жанданатыны сөзсіз», – деді М.Мырзағалиев.

Министр барлық жергілікті балық шаруашылығы өкілдерін 24 қыркүйекте Премьер-Министр Асқар Маминнің қатысуымен Шардара қаласында өтетін балық шаруашылығы бойынша республикалық семинарға қатысуға шақырды. Онда кәсіпкерлерге балық аулау мен балық өсіруді қатар жүргізу тәжірибесі таныстырылмақ.

Еске салсақ, балық саласындағы өңірдің ерекшелігін ескере отырып, 27 ақпанда Атырау қаласында Балық шаруашылығын дамыту мәселелері туралы Үкіметтің жиналысы өткен. Оған Премьер-министр Асқар Ұзақбайұлы Мамин төрағалық етті. Сол кезде Үкімет басшысы берген тапсырмалардың біразы шешімін тауып жатыр. Айталық, атыраулық балықшылардың өтініші бойынша Каспий теңізі мен Жайық өзенінде балық аулау мерзімдері ұзартылды.

Сонымен бірге, осы жылдың 18 тамызында балық шаруашылығының перспективалары бойынша Үкіметі отырысы болды. Нәтижесінде 1 қарашаға дейін облыс әкімдіктеріне балық шаруашылығын дамытудың өңірлік бағдарламаларын әзірлеу тапсырылды. Бұл аймақтарда, оның ішінде Атырау облысында да балық шаруашылығын қарқынды дамытуға өз септігін тигізбек.

Ақпарат үшін:

Атырау облысында кәсіптік балық аулау жүзеге асырылатын 3 су қоймасы орналасқан. Олар: Орал, Қиғаш өзендері мен Каспий теңізінің Қазақстандағы бөлігі. 2020 жылдың 8 айында Атырау облыстық инспекциясы қызметкерлері 752 тұлғаға қатысты 1301 табиғатты қорғау заңын бұзу фактісін тіркеген. Оларға жалпы құны 14,9 млн теңге айыппұл салынып, 11,5 млн теңгесі өндірілді. Құқық бұзушылардан 11,1 тонна частик тұқымдас балық, 9 кг бекіре, 1484 балық аулау құралы тәркіленді.

Экология, геология және табиғи ресурстар министрлігі, ІІМ және Ұлттық қауіпсідік комитеті бірлесе өткізген 2020 жылдың 1 сәуірі мен 31 мамыр аралығындағы «Бекіре-2020» балықты қорғау акциясы аясында 1129 табиғатты қорғау заңын бұзу фактісі тіркелді. Оның 883-Атырау облысына тиесілі. Балық қорғау саласы, полиция және шекара қызметшілері заңсыз айналымнан 13,9 тонна балық тәркіледі.