Дереккөз: inform.kz
НҰР-СҰЛТАН. ҚазАқпарат – Бүгін елорда әкімі Алтай Көлгінов Қазақстан Республикасының Экология, геология және табиғи ресурстар министрі Мағзұм Мырзағалиевпен бірге тұрмыстық қалдықтарды өңдеу кешеніне барды, деп хабарлайды қала әкімінің ресми сайты.
Қазақстан Республикасының қалдықтармен жұмыс істеу саласындағы мемлекеттік саясаты «жасыл» экономикаға көшу тұжырымдамасында айқындалған және қалдықтарды жеке жинауды енгізуге, қалдықтарды қайта өңдеу секторын дамытуға, оның ішінде мемлекеттік-жекешелік әріптестік арқылы қайта өңдеу өнімдерін өндіруге бағытталған.
Қазақстанның астанасындағы қалдықтарды қайта өңдеу бойынша зауыт – қайталама шикізатты қалпына келтіру арқылы қатты қалдықтарды сұрыптауды жүзеге асыратын, сондай-ақ сұрыпталған пластмассаларды өңдеуге арналған өндірістік нысандары бар қаланың жалғыз кәсіпорны. Елордада 65 қоқыс шығаратын компаниядан кешенге күн сайын 950 тонна ҚТҚ түседі. Қазақстанда өткізілетін іс-шаралар қатты қалдықтарды қайта өндеу үлесін 2018 жылы 11,51% -ға дейін арттыруға мүмкіндік берді, ал 2017 жылы бұл көрсеткіш 9%, 2016 жылы – 2,6% болатын.
Бүгінгі таңда республика бойынша 204 қала мен аудандардан әртүрлі кезеңдерде бөлек жинау 51, ал сұрыптау 30 елді мекенде енгізілген. Сонымен қатар, қалдықтарды бөлек жинау және сұрыптау ірі қалалар мен қоса өңірлерде де жүзеге асырылуда. Сұрыптау кешендерінде мыңнан астам жұмыс орны ашылды. Сонымен қатар, қатты қалдықтарды өңдеу саласын одан әрі дамыту үшін қолайлы инвестициялық ахуал, мемлекеттік қолдау шаралары, мемлекеттік және жергілікті бюджеттерден қаражат бөлу, сондай-ақ жеке инвестицияларды тарту қажет. Осыған байланысты қатты тұрмыстық қалдықтарды басқару саласындағы проблемаларды жан-жақты шешу және осы салада бірыңғай көзқарас қалыптастыру үшін Экология, геология және табиғи ресурстар министрлігі мүдделі мемлекеттік органдармен және ұйымдармен бірлесіп қатты тұрмыстық қалдықтарды басқару саласындағы мемлекеттік бағдарламаны әзірлеу бойынша жұмыс жүргізіп жатыр.
Қатты тұрмыстық қалдықтарды жеке жинауды табысты жүзеге асыруда халықтың экологиялық санасы мен мәдениеті маңызды рөл атқарады. Сондықтан, экологиялық білімді арттыру мақсатында республикалық және жергілікті деңгейді ауқымды ақпараттық жұмыс жүргізілуде.
Дереккөз: infrom.kz
НҰР-СҰЛТАН. ҚазАқпарат – 6 шілде күні 2019 жылғы Халықаралық бағбаншылық көрмесі аясында Шанхай ынтымақтастық ұйымының күні өтті, деп хабарлайды ҚазАқпарат тілшісі.
“Өткен жылдың маусым айында Циндаода өткен Шанхай ынтымақтастық ұйымының саммиті барысында қоршаған ортаны қорғау саласындағы ШЫҰ-ға мүше мемлекеттер ынтымақтастығының тұжырымдамасы қабылданған болатын. Аталған тұжырымдама аясындағы өзара іс-қимылдың маңызды бағыты экологиялық қауіпсіздік, климат өзгерістеріне бейімделу, қалдықтарды басқару, экологиялық білім деңгейін арттыру, сонымен қатар “жасыл дамуды” ілгерілету саналады”, -деді Бейжің маңындағы Яньцин қаласында өткен салтанатты шара барысында ШЫҰ бас хатшысы Владимир Норов.
Оның атап өтуінше, 2019 жылдың 14 маусымында Бішкекте өткен ШЫҰ саммиті аясында аталған тұжырымдаманы жүзеге асыру бойынша іс-шаралар жоспары бекітілген.
“Мұның барлығы да ШЫҰ және біздің мемлекеттеріміздің көшбасшыларының еуразиялық кеңістіктегі қоршаған ортаны қорғауға күш-жігерлерін шоғырландыруға ұмтылатындығына дәлел бола алады”, – деді дипломат.
ШЫҰ күнінен елшілер, дипломаттар, мүше мемлекеттердің, бақылаушы елдердің ресми тұлғалары, қытай үкіметінің, мәдениет және өнер өкілдері, жалпы 300-ден астам қонақ қатысты. Шараның ресми бөлімі аяқталғаннан кейін концерт болды.
Естеріңізге сала кетсек, 29 сәуір мен 7 қазан аралығында 2019 жылғы Халықаралық бағбаншылық көрмесі өтіп жатыр. Аталған шараға әлемнің 86 елі мен 24 халықаралық ұйым қатысуда. ШЫҰ-ның бағы жер, ауа және су негізінде әрленген.
Дереккөз: inform.kz
АЛМАТЫ. ҚазАқпарат – ҚР АШМ Орман шаруашылығы мен жануарлар әлемі комитетінің баспасөз хатшысы Сәкен Ділдахмет Facebook парақшасында Көлсай көлдерінен медуза табылғанын жариялады, деп хабарлайды ҚазАқпарат тілшісі.
Оның айтуынша, ерекше күзетілетін территорияларда «Балық шаруашылығы ғылыми-өндірістік орталығы» ЖШС мамандары Орта және Төмен Көлсайдағы фаунаны 2016-2019 жыл аралығында зерттеп келеді.
Атап айтқанда, гидробиология мен гидроаналитика зертханасының қызметкерлері көл түбіндегі микроорганизмдерді бақылауға алған.
«Орта Көлсай суынан тұщы суда өмір сүретін медуза табылғанда таң қалдық. Біздің су қоймаларында бұл жәндіктер өте сирек кездеседі. Алайда соңғы жылдары тұщы суда өмір сүретін жылу сүйгіш медузалардың барлығы жиі айтылып келеді. Бұндай тіршілік иесі Шымкент жанындағы Тоғыз көлінен де табылған», – деді Сәкен Ділдахмет.
Мамандардың пікірінше, Limnocnida tanganyicae және Craspedacusta sowerbii медузаларының суда пайда болуына су температурасының жайлылығы ықпал етеді.
«Көлсайда жазда су температурасы 15-16 градустан аспайды. Бұл медузалар үшін ең шекті температура болып табылады. Олардың Көлсай көлдеріне қалай түскені белгісіз. Бұл медузаны көлге туристердің бірі алып келген болар. Немесе бір құс әкелген болар. Төменгі температурада медузалардың көбеюі ақылға сыймайды. Себебі, Көлсай көлдерінен медузалар қайталап табылып жатқан жоқ», – деді ол.
Алайда мамандар осы ерекше күзетілетін аймақтың фаунасын барынша бақылауға алу керектігін ескертеді.
2019 жылдың 26-28 маусым аралығында ҚР ЭМ «Қоршаған ортаны қорғаудың ақпараттық-талдау орталығы» ШЖҚ РМК-ның Біліктілікті арттыру бойынша басқармасымен Ақтөбе қаласында «Экологиялық кодекс. Құқыққолдану» тақырыбына семинар өткізілді.
Семинар жұмысына «КазЭкоБиоСистема» ЖШС, «ЭКО Пром KZ» ЖШС, «NEO PLUS» ЖШС, «Ақжар-хром» ЖШС, «Батыс Қазақстан облысының табиғи ресурстар және табиғат пайдалануды реттеу басқармасы» ММ, «GREENJAIK» ЖҚ, Қазақстан Республикасы Білім және ғылым министрлігінің «Қ. Жұбанов атындағы Ақтөбе өңірлік мемлекеттік университеті» ШЖҚ РМК өкілдері қатысты.
Семинарда келесі сұрақтар қарастырылды: мемлекеттік аналитикалық экологиялық бақылау саласындағы заңнамалық талаптарды орындау бойынша тәжірибелік ұсынымдар, мониторингілеудің автоматтандырылған жүйесі, Қазақстан Республикасының орнықты органикалық ластағыштар туралы Стокгольм конвенциясында көзделген міндеттері, қалдықтарды өңдеуге арналған технологияларды, техника мен жабдықты әкелуді экологиялық реттеу және т.б.
Семинар қатысушылары соңғы өзгертулер мен толықтырулар жасалған Қазақстан Республикасының Экологиялық кодексі және қоршаған ортаны қорғау саласындағы нормативтік-құқықтық актілер енгізілен дискілермен қамтамасыз етілді.
Семинар куәліктерді табыстаумен аяқталды.
Дереккөз: inform.kz
АЛМАТЫ. ҚазАқпарат – Алматыда Панфилов көшесінде жайқалып тамыр жая алмай қалған ағаштардың орнына күзде басқа ағаштар отырғызылатын болды, деп хабарлайды ҚазАқпарат тілшісі.
Панфилов көшесі былтыр қайта жаңғыртылған болатын. Құрылыс жұмыстарынан соң мердігер ұйым мұнда 380 ағаш отырғызған еді. Ағаш көшеттерін тасымалдау және отырғызу кезінде біраз күш түскен. Олар жаңа орынды жерсінбей әрі аязға шыдамай, салдарынан катальпа көшеті жарамсыз болып қалды.
Осыған орай,«Компания АИС Астана» мердігерлік ұйымы кепілдемелік міндеттеме бойынша биылғы жылдың вегетация маусымында жаңа ағаштар отырғызады.
Айта кетерлігі, 2015 жылы қалалықтардың талқылауынан соң қабылданған «Алматы-2020» Бағдарламасы аясында қаланың тарихи орталығының 60% жөнделді. Жайлы қалалық орта қалыптастыру мақсатында энергия жинақтаушы тротуар шамдары, көше жиһаздары, спорт және балалар алаңдары, фонтан кешендері пайда болады. Жасылдандыру жүргізілді және жаңа ағаштар отырғызылды, суарудың автоматты жүйесі тартылды.
«Қала адамдар үшін» концепциясы аясында Алматыда биылғы жазда жаяу жүргіншіге басымдық беру үшін Достық даңғылының, Жібек жолы мен Байсейітова көшелерінің бөліктеріне реконструкция жүргізілуде.
Дереккөз: 24.kz
Қазақстанның батысы мен солтүстігінің кей жерлерінде қатты жаңбыр тудырған биіктегі циклон Батыс Сібірге баяу жылжып, толтырылады.
Тропосфералық ағындар ендікке ауыса бастайды, яғни ауа массалары Атлантикадан келе бастайды. Сондықтан солтүстік облыстарда жаңбыр әлі де сақталып, ал республиканың оңтүстік облыстары жоғары атмосфералық қысымда болады. Сондықтан солтүстік облыстарда жылы ауа райы күтіледі. Оңтүстік облыстарында ауа температурасы климаттық нормадан жоғары болжанғанымен, 40 градустық ыстық күтілмейді.
Дереккөз: 24.kz
Мемлекет басшысы Қасым-Жомарт Тоқаев «Ядролық қаруға тыйым салу туралы шартты ратификациялау туралы» Қазақстан Республикасының Заңына қол қойды.
Бұл туралы Ақорданың баспасөз қызметі хабарлайды.
Заңның мәтіні баспасөзде жарияланады.
Дереккөз: 24.kz
Ақтөбе облысында биылғы күзде 11 ауылға көгілдір отын жетеді, деп хабарлайды «Хабар 24».
Қазір құбыр тарту жұмыстары жүргізіліп жатыр. Ал келер жылы тағы 4 елді мекенді газ желісіне қосу жоспарда бар. Нәтижесінде алты ауданның 7300-ден астам тұрғыны көгілдір отынмен қамтылады. Жалпы газдандыру жобасын жүзеге асыру үшін бюджеттен қомақты қаржы бөлінген. 2025 жылға дейін кешенді жоспар бар. Бүгінде аймақ тұрғындарының 88 пайызы көгілдір отын тұтынып отыр. Келер жылдан бастап тағы 15 ауылға газ құбырын тарту көзделуде.
Қаржаубай Ыбраймұлы, облыстық Энергетика және ТҮКШ басқармасы басшысының орынбасары:
– 15 жобаға орай сатып алу, тапсырыс жұмыстары жүріп жатыр.Ол да биыл басталады. Бұл дегеніміз, 3 млрд 300 мың теңге ақша. Ол да 15 елді мекенді газбен қамтамасыз етуге бағытталған. 2020-2022 жылдарға жалпы республикаға біздің тарапымыздан 33 газбен жабдықтау жобаларын іске асыруға, 16 млрд-қа тапсырыс беріліп отыр.
Дереккөз:inform.kz
НҰР-СҰЛТАН. ҚазАқпарат – Синоптиктер 28 маусым күнгі ауа райы болжамын жариялады, деп хабарлайды ҚазАқпарат Қазгидрометке сілтеме жасап.
Атмосфералық фронттардың өтуіне байланысты республиканың басым бөлігінде түрақсыз ауа-райы сақталады. Найзағай ойнап, жаңбыр жауады. Жел күшейеді, бұршақ жаууы ықтимал. Дауыл тұрады. Солтүстіктің кей жерлерінде тұман түседі.
Түркістан обысының кей жерлерінде дауыл, шаңды дауыл күтіледі, жел екпіні – 15-20 м/с, күндіз 23 м/с дейін жетеді.
Ақмола облысында күндіз кей жерлерде жел 15-20 м/с дейін күшейіп, бұршақ жауады. Түнде және таңертең тұман түседі.
Солтүстік Қазақстан облысында түнде және таңертең тұман түседі, күндіз жел екпіні – 15-20 м/с. Бұршақ жаууы мүмкін.
Павлодар облысының кей жерлерінде дауыл тұрады. Жел екпіні – 15-20, 23-28 м/с, бұршақ жаууы ықтимал.
Қостанай облысының кей жерлерінде тұман түседі, жел қарқыны 15-20 м/с дейін күшейеді. Күндіз бұршақ жауады.
Қарағанды, Шығыс Қазақстан облыстарының кей жерлерінде дауыл тұрады. Жел екпіні – 15-20 м/с.
Қызылорда облысының кей жерлерінде дауыл соғады, жел жылдамдығы 15-20 м/с жетеді.
Күндіз Атырау, Батыс Қазақстан, Жамбыл облыстарының кей жерлерінде жел 15-20 м/с дейін күшейеді. Батыс Қазақстан облысында бұршақ жаууы ықтимал.
Күндіз Алматы, Атырау, Батыс Қазақстан, Маңғыстау облыстарында аптап ыстық күтіледі.
Қызылорда, Түркістан, Атырау облысының басым бөлігінде, Батыс Қазақстан, Ақтөбе облысының кей жерлерінде, Қостанай, Алматы, Жамбыл облыстарында жоғары өрт қаупі сақталады.
Дереккөз: inform.kz
ПЕТРОПАВЛ. ҚазАқпарат – Солтүстік Қазақстан облысында «Браконьер» атты жедел-профилактикалық іс-шарасы аяқталып, 100-ден астам заң бұзушылық анықталды, деп хабарлайды ҚазАқпарат тілшісі.
СҚО Полиция департаменті баспасөз қызметінің хабарлауынша, Мағжан Жұмабаев ауданында орманды заңсыз отағаны үшін Булаев қаласының 32 жастағы тұрғыны ұсталды. Ол Медвежка ауылының маңында 304 қайың мен 47 теректі тиісті құжаттарсыз кескен. Табиғатқа келген шығын – 270 мың теңге шамасында. Ер адам енді 40 тәулікке дейін бас бостандығынан айырылуы немесе 400 мың теңге көлемінде айыппұл төлеуі мүмкін. Сондай-ақ ол шығынның орнын толтыруы тиіс.
«Қостанай облысының екі тұрғынына да айыппұл салынуы мүмкін. Олар Тимирязев ауданында 300 келідей заңсыз балық аулаған. Операция барысында заңсыз балық аулаған 27 адамды анықтадық, олар әкімшілік жауапкершілікке тартылады», – СҚО ПД ЖПҚБ табиғатты қорғау полициясының аға инспекторы Сергей Липко.
«Браконьер» жедел-профилактикалық іс-шарасының бес күнінде табиғатты қорғау заңнамасын бұзған 117 дерек анықталды. Сондай ақ тәртіп сақшылары қазіргі уақытта аң мен құс аулауға тыйым салынғанын ескертеді. Ал балықты рұқсат алған жағдайда ғана аулауға болады.