АСТАНА. ҚазАқпарат – Бүгін Парламент Сенатының жалпы отырысында палата депутаттары «Қазақстан Республикасының кейбір заңнамалық актілеріне Қазақстан Республикасының «жасыл экономикаға» көшуі мәселелері бойынша өзгерістер мен толықтырулар енгізу туралы» заң жобасын бірінші оқылымда мақұлдады.

Заң жобасы ҚР Президентінің Жарлығымен бекітілген «жасыл экономикаға» көшу тұжырымдамасын іске асыруға бағытталады. Осы бағытта қолданыстағы бірқатар заңнамаларға өзгерістер енгізу көзделіп отыр. Атап айтқанда, Жер және Су кодекстеріне нысаналы көрсеткіштер мен стандарттарды әзірлеу арқылы су объектілерін қорғауды жақсарту нормалары ұсынылады. Су сапасын арттыру, ауыз сумен жабдықтауды бақылау күшейтілетін болады.

Бұдан бөлек, қайта өңдеу және қалдықтардан жасалатын пайдалы материалдарды қайталама пайдалануды кеңінен қолдану шараларын ынталандыру қаралып отыр. Бұл ретте қайтадан пайдаланылатын шикізатты қолданған тауарларға басымдық беріліп «жасыл сатып алулар» тетігі енгізіледі.

Сонымен қатар жаңартылатын энергия көздері секторын дамытудың нысаналы көрсеткіштері бекітіліп, уәкілетті органның жаңартылатын энергия көздері секторын жоспарлы түрде дамыту шаралары қамтылады.

АСТАНА. ҚазАқпарат – Адамдардың әл-ауқаты табиғи ресурстарды ұқыпты пайдалу есебінен айқындалады. Бұл туралы бүгін Парламенті Мәжілісінің сайлауына қатысатын еліміздегі алты саяси партия өкілдері арасындағы телесайыс барысында «Бірлік» партиясының мүшесі Роза Қуанышева мәлім етті.

Еліміздегі экологиялық мәселелерге мән беру керек екеніне тоқталған ол: «Бізді алаңдатып отырған елеулі проблемалардың бірі су ресурстарының тапшылығына байланысты. Әрбір қазақстандық өздеріне «экономикалық қуатты, экологиялық жайлы елде тұру үшін не істеу керек?» деген сауал қоюға шақырамыз. Осы сұрақ барша тұрғындарды алаңдатуы тиіс. «Бірлік» партиясы осыған қатысты жауапты біледі»,-деді.

Бұл ретте Роза Қуанышева адал әрекеттер, істер мен ниеттер, таза қоршаған орта еліміздің жаһандық әлемдегі лайықты орнын айқындайтынын атап өтті.

«Бүгінде дамыған мемлекет – ол «жасыл экономикасы» бар ел болып табылады. Осы тұрғыда адамдардың әл-ауқаты табиғи ресурстарды ұқыпты пайдалу есебінен айқындалады. «Жасыл экономика» дамуды ынталандырып, тұрақтылыққа жағдай жасайды, экономикалық әлеуетті арттырады және жаңа жұмыс орындарын құрады. Біз экономикалық рельстерімізді бұрып, «жасыл экономикаға» қарай жүруіміз керек», – деді ол.

Оның айтуынша, партия таңдаған бағыт болашақтағы экологиялық апаттардың алдын алуға негізделіп отыр.

Дерек көзі: http://inform.kz/kaz/article/2881510

Пресс-релиз

2016 жылдың 10 наурызында Парламент Сенаты «Қазақстан Республикасының кейбір заңнамалық актілеріне экологиялық мәселелер бойынша өзгерістер мен толықтырулар енгізу туралы» Қазақстан Республикасы Заңын екінші оқытылымда қабылдады.

Осы Заңды қабылдаудың мақсаты  Қазақстан Республикасы Экологиялық кодексінің парниктік газдар шығарындыларын реттеу бөлігіндегі ережелері мен нормаларындағы  оқылықтарды жою және экологиялық заңнаманы 2000 жылғы 23 қазандағы Қазақстан Республикасының Заңымен ратификацияланған Қоршаған ортаға қатысты мәселелер бойынша ақпаратқа, көпшіліктің шешім қабылдау процесіне қатысуына қол жеткізу және әділсотқа қолжетімділік туралы конвенцияға (Орхус конвенциясы) сәйкес келтіру болып табылады.

Осы заңның жобасы 2 бағытты қамтиды:

1)       Қазақстан ратификациялаған Орхус конвенциясын одан әрі орындау;

2)       парниктік газдардың шығарындыларын реттеуді жетілдіру.

         Бірінші бағыт бойынша:

заң жобада Қазақстан Республикасының Экологиялық және Салық кодекстеріне өзгерістер мен толықтырулар енгізу көзделген.

Экологиялық кодексте толық экологиялық ақпаратты жинау, сақтау, толықтыру және көпшілікке беру мәселелерін көздеу ұсынылады. Ол үшін мемлекеттік органдар мен табиғат пайдаланушылардың тиісті экологиялық ақпаратты кейіннен оны міндетті түрде мемлекеттік көрсетілетін қызметтер арқылы ақысыз түрде беру үшін Мемлекеттік экологиялық ақпарат қорына ұсынуы шаралары көзделген.

Сонымен қатар, жыл сайын Қоршаған ортаның жай-күйі және табиғи ресурстарын пайдалану туралы ұлттық баяндаманы шығару көзделеді.

Экологиялық ақпараттың тағы бір маңызды көзі Ластаушылардың шығарындылары мен тасымалдарының мемлекеттік тіркелімін жасау болып табылады, оның негізгі мақсаты қоршаған орта және табиғат пайдалану мәселелері бойынша шешім қабылдау процесінің ашықтығын қамтамасыз ету болып табылады.

Ластаушылардың шығарындылары мен тасымалдарының мемлекеттік тіркелімі – Энергетика министрлігінің интернет-ресурсында ашық түрде орналастырылған қоршаған ортаны ластау көздері, көлемі, бақылау шаралары, мониторингі және ластануды төмендету бойынша құрылымдық деректер қорын білдіреді.

Сондай-ақ қоғамдық тыңдаулар өткізу міндетті болатын шаруашылық қызмет жобаларының тізбесі заңнамалық деңгейде айқындалатын болады.

Әділсотқа қол жеткізуді жеңілдету үшін қоғамдық бірлестіктер қоршаған ортаны қорғау мәселелері бойынша жеке тұлғалардың құқықтарын қорғау үшін, оның ішінде тұлғалардың белгісіз тобының мүдделеріне сай сотқа жүгіну құқығына ие болады.

Салық кодексінде заңды және жеке тұлғаларды мүліктік емес сипаттағы экологиялық даулар бойынша мемлекеттік баж салығын төлеуден босату бойынша норма қарастырылған.

Осы өзгертулер ашық және и транспарантті қоғам құру бойынша мақсаттарды табысты жүзеге асыруға мүмкіндік береді.

Парниктік газдар шығарындыларын реттеуді жетілдіру жөніндегі екінші бағыт бойынша

Заң жобасымен бірқатар терминдерді нақтылау, парниктік газдар шығарындыларына квоталарды белгілеу, беру және өзгерту аспектілері бойынша коллизияларды жою бөлігінде Қазақстан Республикасының Экологиялық кодексіне өзгерістер мен толықтырулар енгізу қарастырылуда. Үкіметтік квоталар резервін басқару жүйесі арқылы биржада квоталарды саудалау бөлігінде нормативтік актілерді жетілдіру қажет, сондай-ақ  квоталарды бөлудің тарихи әдісін қайта қарау арқылы кәсіпорындарға квоталарды әділ үлестіру рәсімін қамтамасыз ететін заңнамалық актілердің нормаларына түзетулер қабылдауды қажет етеді.

Осыған байланысты, еліміздің экономикасына белгілі бір зардаптар әкелетін әлемдік дағдарысты есепке ала отырып, Экологиялық кодекстің 9-1-тарауының 94-2-бабын 2018 жылдың 1 қаңтарына дейін (6-тармақтан басқа), 94-3, 94-4, 94-7, 94-9) тоқтата тұру қолдау тапты.

Сонымен қатар, ҚР Экологиялық кодексінің материалдық нормаларынан туындайтын «Әкімшілік құқық бұзушылық туралы» Қазақстан Республикасы Кодексінің 329 және 330-баптарына өзгерiс пен толықтыру енгiзілген.

Аталған түзетулер парниктік газдар шығарындылары бойынша  есептілік, мониторинг және верификация жүйесін жақсартуға, сондай-ақ тиімді тәсілмен парниктік газдар шығарындыларына квоталарды ішкі саудалау және квоталау жүйесінің жұмыс істеуінің түпкілікті мақсатын анықтауға мүмкіндік береді.

АСТАНА. ҚазАқпарат – Мемлекет басшысы Нұрсұлтан Назарбаев «Ақтөбе жылыжай» ЖШС жылыжай кешеніне барды, деп хабарлады Ақорданың баспасөз қызметінен.

Елбасы кешенді аралап, көкөніс өсіру технологиясымен танысты.

Сондай-ақ, Нұрсұлтан Назарбаевқа ауыл шаруашылығын дамытудың өңірдегі негізгі бағыттары, соның ішінде азық-түлік қауіпсіздігін қамтамасыз ету жөніндегі кешенді шаралар туралы баяндалды. Бұдан бөлек, Қазақстан Президенті облыстағы ауыл шаруашылығы өнімдерін өндірушілермен әңгімелесті.

Нұрсұлтан Назарбаев ғылыми тәсілдерді қолданудың маңыздылығына айрықша назар аудара отырып, ауыл шаруашылығы саласының өнімділігін арттыру қажеттігін айтты.

Мемлекет басшысы планета халқының көбейіп келе жатқанына байланысты аграрлық сала өнімдеріне ұдайы сұраныс болатынына тоқталды. Сондықтан, ауыл шаруашылығы тауарын өндірушілерді Қазақстан Президенті мемлекет ұсынған мүмкіндіктерді толық пайдалануға, өндіріске жаңа технологиялар енгізуге және озық халықаралық тәжірибелерді игеруге шақырды.

Жабық жерде көкөніс өндіретін жылыжай кешені жалпы ауданы 3 гектар аумақта орналасқан. Жобалық қуаты жылына 1500 тонна көкөніс өндіруге лайықталған.

АСТАНА. ҚазАқпарат – Бүгін Сенаттың жалпы отырысында «Қазақстан Республикасының кейбір заңнамалық актілеріне экология мәселелері бойынша өзгерістер мен толықтырулар енгізу туралы» заң жобасы бірінші оқылымда мақұлданды.

Аталған заң жобасының мақсаты ұлттық экологиялық заңнаманы Орхус конвенциясына сәйкес келтіру болмақ. Қоршаған ортаға қатысты мәселелер бойынша шешімдерді қабылдау процесіне және әділсотқа қол жетімділікті іске асыру туралы конвенцияның (Орхус конвенциясы) негізгі функциялары қоршаған орта саласындағы мәліметтердің ақпараттық қорын қалыптастыру болып табылады. Бұдан бөлек, ақпараттарды қолдану мен жеке және заңды тұлғалардың сұрауы бойынша экологиялық ақпарат ұсыну қамтамасыз етіледі. Заң жобасына сәйкес парниктік газ шығарындыларына квота белгілеу, беру және өзгерту мәселелері бойынша Экологиялық кодекске өзгерістер енгізу күтіледі.

«Заң жобасы аясында қоғамдық есеп берулерді өткізу процедураларына өзгерістер енгізіліп, қоршаған ортаның жағдайы және табиғи ресурстарды пайдалану туралы жыл сайынғы ұлттық баяндама әзірлеу қарастырылады. Бұдан бөлек, шығарындылардың мемлекеттік тіркелімін құру көзделеді», – деді Энергетика министрі Владимир Школьник. Оның айтуынша, заң жобасына сәйкес, міндетті түрде экологиялық қоғамдық тыңдаулар өткізілетін жобалар мен экономика қызметтерінің саласы айқындалады. Сонымен бірге, табиғатты пайдаланушылармен қол қойылғаннан кейінгі бес күннің ішінде жергілікті атқарушы органның интернет-ресурстарында мемлекеттік экологиялық сараптаманың қорытындысы жарияланады.

Осылайша, заң жобасымен экологиялық ақпараттардың мемлекеттік қоры арқылы қоғамды ақпараттандыру жүйесінің тәртібі қарастырылып отыр. Тұтастай алғанда, заң жобасы арқылы ұсынылатын өзгерістер мен толықтырулар квоталаудың тиімді жүйесін енгізуге, парниктік газдар шығарындыларына квоталарды ішкі саудалауға қатысты болып отыр.

АСТАНА. ҚазАқпарат – Қазақстанда қоршаған ортаға эмиссияны қысқарту қарастырылады. Бұл туралы бүгін Сенаттың Экономикалық саясат, инновациялық даму және кәсіпкерлік комитетінің кеңейтілген отырысында мәлім болды. Комитетте «ҚР кейбір заңнамалық актілеріне экологиялық мәселелер бойынша өзгерістер мен толықтырулар енгізу туралы» заң жобасы талқыланған болатын.

«Заң жобасы бірқатар жаңа нормаларды қамтып отыр. Біріншіден, қоршаған ортаға эмиссияны қысқарту көзделеді. Екіншіден, экология саласында мемлекеттік органдар тарапынан көрсетілетін мемлекеттік қызмет түрлерінің саны қысқарады. Үшіншіден, құрлықтық қайраңдарда табиғатты пайдалану құқығын жүзеге асыру барысында мемлекеттік шекараны кесіп өтудің кейбір мәселелері реттеледі», – деді Энергетика вице-министрі Әсет Мағауов.

Оның айтуынша, құжатта ілеспе газдарды жағу саласындағы мемлекеттік органдардың бірқатар функцияларын орындау оңтайландырылады. Тұтастай алғанда, заң жобасымен «Жер қойнауы туралы», «Жер қойнауын пайдалану туралы» және  «Қазақстан Республикасының мемлекеттік шекарасы туралы» заңдарына өзгерістер мен толықтырулар енгізу көзделіп отыр.

Заң жобасы алдағы уақытта өтетін палатаның жалпы отырысына шығарылмақ.

Тәуелсіздік сарайында ЕХРО-2017 көрмесіне қатысуға ниет білдірген елдерден келген делегаттардың қатысуымен алқалы жиын басталды.

Бұл – олардың екінші басқосуы. Олар көрме өтетін қалашықтағы павильонды аралап, тиесілі аумақтарын белгілеуі тиіс. Тәуелсіздік сарайындағы алқалы жиында 100-ге жуық мемлекеттің арнайы делегаттары жиналды. ЕХРО-2017 халықаралық қатысушыларының екінші жиынында алдағы ауқымды шараға қатысты маңызды мәселелер талқыланбақ.

Елордада өтетін халықаралық көрмеге қатысушыларды тіркеу осыдан екі жыл бұрын басталған еді. Содан бері ҚР Сыртқы істер министрінің бірінші орынбасары, ЕХРО-2017 көрмесінің комиссары Рәпіл Жошыбаев әлемдегі 100-ге тарта мемлекеттің өкілдерімен кездесіп, оларға арнайы шақырту ұсынды. Нәтижесінде 75 ел бас қаламызда өтетін әлемдік шараға қатысатынын ресми түрде растап үлгерген болатын.

Алдағы уақытта қатысушылар санын 100-ге жеткізу көзделіп отыр. Бүгінге дейін 55 комиссар тағайындалып, 27 келісімшарт жасалған. Ал осы жиын барысында ұйымдастырушылар мен жер жаһаннан келген 250-ден астам делегат алдын ала келісімдер жасасып, көрмеге қатысушылар үшін қолайлы жағдай жасаудың тиімді жолдарын қарастырып жатыр. Сондай-ақ қонақтар көрме қалашығындағы павильонды аралап, тиесілі аумақтарын белгілеуі тиіс. Айта кетейік, павильон аумағы әр мемлекетке тиесілі мөлшерде бөлінеді.

Источник: http://24.kz/kz/zha-aly-tar/basty-zha-aly-tar/item/107738-ekhro-2017-k-rmesine

АЛМАТЫ. ҚазАқпарат – Алматыдағы Президент паркінде Тұңғыш Президент мұражайы ашылады. Бұл туралы бүгін қала әкімінің төрағалығымен өткен жиын барысында белгілі болды.

Тұңғыш Президент саябағын жаңғырту жобасын «AGS Project Engineering» директоры Роман Шнайдерман ұсынды.
«Саябақтың оң жағында Тұңғыш Президент мұражайы бой көтереді. Орталық аллея осы музейге жол болады. Аллеяның екі жағында пейзажды көрініс болады. Жақын территорияда балаларға арналған және спорттық алаңқайлар болады. Саябақ пен алаңқайлардың арасында жасыл көпір жасалады. Саябақтың пішіні созылыңқы болған соң, келушілердің көпшілігі оның жоғарғы жағына жете бермейді. Сондықтан, кіру екі жақтан да болады. Шығыс және батыс жағынан», – деді «AGS Project Engineering» директоры Роман Шнайдерман.
Жобаға сәйкес, паркте үлкен көл және жасыл амфитеатр пайда болады.
Қала әкімі Бауыржан Байбектің айтуынша, әр саябақтың өзінің тақырыптық бағыты болуы керек. Тұңғыш Президент саябағы алматылықтар үшін ең ыңғайлы демалыс орны болуы тиіс.

Источник: http://inform.kz/kaz/article/2874720

АСТАНА. ҚазАқпарат – Бүгін Сенаттың Аграрлық мәселелер, табиғатты пайдалану және ауылдық аумақтарды дамыту комиттетінің кеңейтілген отырысында «Каспий теңізінің теңіз ортасын қорғау жөніндегі негіздемелік конвенцияға Мұнаймен ластануға әкелетін тосын оқиғалар жағдайындағы өңірлік әзірлік, ден қою және ынтымақтастық туралы хаттаманы ратификациялау туралы» заң жобасы талқыланды.

Құжатқа Әзербайжан, Иран, Қазақстан және Ресейдің уәкілетті өкілдері 2011 жылғы 12 тамызда Ақтау қаласында қол қойған болатын.  Хаттаманың мақсаты – Каспий маңы елдерінің мұнайдың төгілуіне байланысты тосын оқиғаларға ден қоюға әзірлігін қамтамасыз ету жөніндегі жеке немесе бірлескен қажетті шараларды қабылдауы болып табылады.

Энергетика вице-министрі Әсет Мағауовтың айтуынша, заң жобасына сәйкес Каспий маңындағы мемлекеттер теңіздегі мұнайдың төгілуіне және басқа да оқиғаларға байланысты ақпараттармен алмасатын болады. Бұдан бөлек, төтенше оқиғалар орын алғанда оған ден қою мақсатында өңірлік жоспарлар жасалады.  Сонымен қатар, теңіз маңындағы әрбір мемлекет мүмкіндігінше арнайы техникалардың ең аз санымен қамтамасыз етілуге міндетті болды. Сондай-ақ, егер басқа тараптар сұрау салғанда ондай техникаларды ұсыну және мұнай төгілумен байланысты төтенше жағдайларды жоюға Каспий маңы мемелкеттерінің барлық ұжымдық күшін пайдалану мүмкіндігі қарастырылады.

Тұтастай алғанда, хаттаманы ратификациялау Каспий теңізі мұнаймен ластанған жағдайда өңірлік шаралардың іске асырылуын қамтамасыз етуге мүмкіндік береді.

Заң жобасы палатаның қарауына жіберілді.

Дерек көзі: http://inform.kz/kaz/article/2874398